Në sfidën e parë të vërtetë, në mungesë të Cristiano Ronaldos, Real Madridi ka pësuar humbje nga Sevilla, në ndeshjen e zhvilluar të dielën mbrëma në Roman Sanchez Pizjuan, me rezultat 2-1.
Një fitore plotësisht e merituar e andaluzianëve, të cilët vunë në vështirësi Los Blancos gjatë gjithë ndeshjes. Vendasit kaluan në epërsi me anë të Jesus Navas në minutën e 33-të dhe me këtë rezultat përfundoi edhe pjesa e parë e takimit. Në minutat e para të pjesës së dytë (49’), Mbretërit arritën ta barazojnë rezultatin, mirëpo ky gol ishte krejt çka treguan në këtë ndeshje. Renato ishte heroi i Sevillas në mbrëmjen e sotme, pasi që shënoi golin e dytë dhe të fitores (66’), për t’ia shkaktuar Realit ndalesën e parë të sezonit. Pas kësaj ndeshjeje, Barcelona qëndron në krye të tabelës me tri pikë diferencë nga Real Madridi dhe Sevilla që tashmë kanë pikë të barabarta.

Juventusi ka pësuar humbjen e parë të sezonit në Serie A, pasi është mposhtur në udhëtim te Palermo.
Takimi i zhvilluar të dielën mbrëma në Stadio Barbera, ndërmjet Palermos dhe Juventusit, ka përfunduar me fitoren e sicilianëve me rezultat 2-0. Vendasit shënuan dy herë në pjesën e parë, me anë të Edinson Cavanit (37’) dhe Fabio Simplicios (42’) për t’ia shënuar humbjen e parë të sezonit Zonjës së Vjetër. Pas kësaj humbjeje, Juve pozicionohet në vend të tretë me 14 pikë, aq sa ka edhe Fiorentina që mban vendin e katërt, ndërsa Sampdoria dhe Interi mbajnë dy vendet e para me nga 16 pikë.

Supersfida e javës së tetë në Premier Ligë është zhvilluar në Stamford Bridge ndërmjet Bluve dhe Të Kuqve.
Ndeshja e zhvilluar të dielën, ndërmjet Chelseat dhe Liverpoolit, ka përfunduar me fitoren e vendasve me rezultat prej 2-0. Pjesa e parë e kësaj sfide përfundoi pa gola, mirëpo nuk ndodhi ashtu në pjesën e dytë. Pas plotësisht një orë lojë, Chelsea arriti deri te goli i avantazhit, kur Didier Drogba pasoi te partneri i tij në sulm, Nicolas Anelka, i cili ndëshkoi portierin Pepe Reina, dhe skuadrën e tij të dikurshme. Derisa mysafirët nuk arritën ta barazojnë rezultatin, Blutë shënuan sërish në minutat shtesë të takimit (90’+1), me golin e Florent Malouda, derisa edhe në këtë gol asistues ishte Didier Drogba. Me këtë fitore Blutë marrin kreun e tabelës me dy pikë më shumë se Manchester United që gjendet në vendin e dytë.

Kampioni në fuqi Raiffeisen Superligës, Prishtina, është turpëruar para tifozëve të vet, pasi është mposhtur me rezultat të lartë nga fituesi i Kupës së Kosovës, Hysi.