Mourinho, njeriu i vitit

Trajneri i Real Madridit, Jose Mourinho, është emëruar ‘Njeriu i vitit 2010’ nga gazeta prestigjioze italiane La Gazzetta dello Sport.
Është hera e parë pas 32 vitesh që këtë çmim e merr një trajner, ndërsa kjo vjen pas një viti të jashtëzakonshëm të Mourinhos, i cili e udhëhoqi Interin drejt tre titujve: Scudetto, Coppa Italia dhe Ligë të Kampionëve. Njëherit, Interi u bë ekipi i parë italian që ka fituar tre titujt përnjëherë.
Në verë, portugezi u largua nga zikaltrit për të marrë drejtimin e Real Madridit, skuadër me të cilën ka fituar 20 nga 25 takime në të gjitha garat, kurse vetëm një e ka humbur.

Lexo më shumë

Topçinjtë fitojnë bindshëm

Arsenali ka shënuar fitore bindëse prej 3-0 si mysafir i Birminghamit, për t’iu kthyer fitores pas atij barazimi në fund të ndeshjes në xhiron e njëzet kundër Wigan Athletic.
Topçinjtë kontrolluan ndeshjen që nga fillimi duke krijuar avantazh që në minutën e 13-të përmes Robin van Persie, dhe me epërsi minimale të mysafirëve u mbyll gjysma e parë.
Në fraksionin e dytë të lojës, Arsenali realizoi edhe dy herë, përmes Samir Nasri (58’) dhe një autogoli të Roger Johnson (66’) dhe me rezultat 3-0 përfundoi takimi.
Pas kësaj fitoreje, Topçinjtë mbajnë hapin drejt titullit me dy pikë më pak se liderët nga qyteti i Mançesterit, United dhe City.

Lexo më shumë

Beckham të huazohet te Tottenhami?

Menaxheri i Tottenhamit, Harry Redknapp, ka zbuluar dëshirën e tij për ta transferuar David Beckhamin në White Hart Lane.
“Ne do të kontaktojmë La Galaxy të shohim nëse ata do të lejojnë që Becks të vijë si huazim për tri muaj, pasi që ne definitivisht do të ishim të interesuar. Unë jam i sigurtë se ai mund të luajë mirë në nivelin më të lartë, përndryshe nuk do isha i interesuar”.
“Ai do të ishte lojtar fantastik për ne këtu dhe ai nuk do të vinte këtu sa për të shitur fanella”, u shpreh Redknapp për The Sun.
Ky interesim publik i Redknapp për Beckham vjen vetëm një ditë pasi vet superylli anglez shprehu dëshirën për t’u kthyer në ishull.

Lexo më shumë

City, 18 milionë funte për Lukakun

Manchester City është duke e menduar seriozisht çështjen e transferimit të supertalentit të Anderlechtit, 17 vjeçarit Romelu Lukaku.
Daily Mail shkruan se Manchester City dëshiron ta shmangë interesimin e Real Madridit dhe Chelseat me anë të një oferte prej 18 milionë eurosh për asin belg, i cili ka qenë sensacional për Anderlechtin.
Lukaku nga ana tjetër e ka bërë të qartë se nuk e ka ndërmend të largohet në janar, por se këtë do ta bëjë në fund të sezonit.

Lexo më shumë

Liverpooli i kthehet fitores

Skuadra e Liverpoolit ka arritur të kthehet nga disavantazhi prej një goli për të mposhtur Bolton Wanderers me rezultat 2-1.
Redsat u gjetën në disavantazh në minutën 43-të, kur Kevin Davies realizoi golin e epërsisë për mysafirët dhe me rezultat 0-1 përfundoi pjesa e parë.
Në minutat e para të pjesës së dytë (49’), Fernando Torres barazoi shifrat, ndërsa në minutat shtesë të ndeshjes (90’+2), Joe Cole realizoi golin e fitores.
Pas kësaj fitoreje, Liverpooli ngjitet në vendin e tetë në tabelë me pikë të barabarta me Blackpoolin.

Lexo më shumë

City dhe Tottenham vazhdojnë me fitore

Manchester City ka shënuar fitore minimale prej 1-0 kundër Blackpoolit në kuadër të javës së 21-të të Ligës Premier për të qëndruar në krye të tabelës me pikë të barabarta me liderin Manchester United.
‘Pasanikët’ erdhën deri te goli i avantazhit pas një goditje nga këndi, me ç’rast më mirë u gjet Adam Johnson për të realizuar golin e epërsisë (34’).
Tre minuta më vonë, Carlos Tevez dështoi nga pika e bardhë, ashtu që vendasit fituan me epërsi minimale.
Fitore me rezultat identik ka shënuar edhe Tottenhami kundër Fulhamit, ndërsa realizues ishte Gareth Bale.
Pas kësaj fitoreje, Spursat ngriten në vendin e katërt me dy pikë më shumë se Chelsea, që të dielën zhvillon ndeshjen e javës së 21-të kundër Aston Villas.

Lexo më shumë

Rooney pranon gabimin

Sulmuesi i Manchester United, Wayne Rooney, ka pranuar se ai ka gabuar me qëndrimin që ka mbajtur ndaj menaxherit Sir Alex Ferguson dhe shefit ekzekutiv David Gill.
“Unë shkova te menaxheri dhe David Gill për t’i pyetur rreth ambicieve të klubit. Tani e kuptoj se kjo nuk kishte asgjë të bënte me mua, por unë kam dashur të sigurohem se ishte gjëja më e mirë pë mua”.
“Mirë që e kam rregulluar situatën sepse përndryshe as vet nuk e di se ku do të transferohesha. Një gjë e kam ditur sigurt – nuk do të kisha shkuar te Manchester City apo Liverpooli”, u shpreh Rooney.

Lexo më shumë

I jepni kohë Balotellit

Asistent menaxheri te Manchester City, Brian Kidd, ka bërë thirrje për qetësi sa i përket futbollistit më problematik në planet, Mario Balotelli, duke thënë se italianit i duhet kohë për t’u përshtatur me ambientin.
“Duhet të ketë simpati ndaj lojtarëve. Kur ata ndjejnë se u mungon vendlindja ju nuk kërkoni shumë nga ta. Lojtarët kanë qenë të mirë me Marion. Ekziston mirëkuptim në skuadër. Të gjithë shikojnë gjërat nga ana materiale, por kurrë nuk është e lehtë”.
“Mario po punon shumë në stërvitje dhe të gjithë janë të kënaqur me të, sidomos pas het-trikut ndaj Aston Villas”, u shprehp Kidd.

Lexo më shumë

Del Neri: Viti 2010, i suksesshëm

Trajneri i Juventusit, Luigi Del Neri, ka reflektuar në vitin e kaluar duke thënë se ishte vit i mrekullueshëm për të në nivelin personal.
“Për mua ka marrë fund një vit i shkëlqyer në nivelin personal. Sezoni im fantastik me Sampdorian më lejoi të kaloj te Juventusi, një klub dhe skuadër që është prej më të mirave në botë”.
“Pjesa e parë e sezonit na lejoi të ngjitemi në pozitat e para të tabelës dhe kjo është shenjë e mirë për muajt në vazhdim. Synimi ynë është që të tentojmë t’i fitojmë të gjitha ndeshjet tona me dijeninë se titulli nuk do të jetë lehtë i arritshëm”, deklaroi Del Neri.

Lexo më shumë

Djajtë mbajnë kreun

Manchester United ka arritur të mbajë kreun në tabelën e Ligës Premier pas fitores së vështirë të arritur në transfertë te West Bromwich Albion me rezultat 2-1.
Viti i ri për Wayne Rooneyn nisi për mrekulli, pasi sulmesi anglez shënoi golin e parë nga loja e hapur pas një harkimi fenomenal nga Patrice Evra (3’). Në vazhdim të takimit ishin vendasit ata që dominuan. Një top të kthyer me kokë nga Vidic për mrekulli e shfrytëzoi James Morrison, i cili me një gjysmëvolej realizoi një gol fantastik për 1-1.
Vendasit dominuan edhe në vazhdim të takimit, por ishin mysafirët nga Old Trafford ata që i dhanë fund ndeshjes me anë të Javier Hernandez, i cili u ndihmua nga Wayne Rooney (75’).
Me këtë fitore Manchester United mban kreun me 41 pikë dhe ka një ndeshje më pak se Manchester City në pozitën e dytë, që ka 38 pikë.

Lexo më shumë

Wenger: Transferime? Nuk e di…

Menaxheri i Arsenalit, Arsene Wenger, ka refuzuar të hedhë poshtë mundësinë e transferimeve të reja gjatë afatit kalimtar të janarit.
“Unë nuk them jo, por për moment them se nuk jemi pranë që ta transferojmë askënd”, theksoi Wenger.
Wenger zakonisht në fjalorin e tij shpesh i përdor fjalitë se nuk dëshiron të transferojë asnjë lojtar, pasi që edhe në të kaluarën është bazuar në të rinjtë e akademisë.

Lexo më shumë

Montolivo: Nuk largohem nga Fiorentina

Mesfushori i Fiorentinës, Riccardo Montolivo, ka zbuluar se ai nuk e ka në plan që të largohet gjatë afatit kalimtar të janarit.
“Unë kam lexuar se Interi është i interesuar për mua dhe kjo më kënaq, por nuk ka asgjë konkrete për këto spekulime”.
“Unë jam lojtar i Fiorentinës dhe unë kategorikisht e përjashtoj mundësinë e largimit në janar. Unë jam 100 përqind i sigurtë për këtë”, sqaroi Montolivo.

Lexo më shumë

Mexes: Nuk më është ofruar rinovimi

Qendërmbrojtësi i Romës, Philippe Mexes, ka zbuluar se atij nuk i është ofruar një kontratë e re nga Roma, duke ndezur edhe më tej spekulimet për një kalim të tij te Milani.
“Unë ende nuk kam marrë ofertën për rinovimin e kontratës”.
“Sidoqoftë, dëshira ime është që të qëndroj me këtë klub dhe ka ende kohë për bisedime mes meje dhe Romës”, ka thënë francezi.

Lexo më shumë

Leonardo te Interi për para

Mesfushori i Milanit, Gennaro Gattuso, beson se ishin të hollat ato që e kanë joshur ish-strategun Rossoner, Leonardo, të kalojë te rivali i përbetuar Inter.
“Ne kurrë nuk kemi pasur ndonjë marrëdhënie, asgjë, nuk kishte ndjenja mes nesh. Duke parë skuadrën që kemi pasur sezonin e kaluar, mund të themi se Leonardo bëri punë të mirë, por ai gjithashtu tha se zeja e trajnerit nuk ishte për të”.
“Ai nuk ka dashur të jetë trajner dhe këtë e ka thënë shumë herë. Siç e shihni, Zoti i parasë mund të bëjë mrekullira. Unë i dëshiroj çdo të mirë Leonardos, por gjithashtu shpresoj se ai nuk do të fitojë asgjë me Interin”, deklaroi Gattuso për Il Corriere della Sera.

Lexo më shumë

Pique: Cesc, Cesc, Cesc

Mbrojtësi i Barcelonës, Gerard Pique edhe njëherë publikisht e ka shprehur dëshirën e tij për ta parë në vitin 2011 asin e Arsenalit, Cesc Fabregas, të luajë në fanellën Blaugrane për skuadrën nga Camp Nou, Barcelona.
“Do të ishte mirë ta shoh mikun tim Cesc të luajë në Camp Nou”, theksoi Pique për El Mundo Deportivo.
Barcelona dhe Arsenali janë shortuar në 1/16 e Ligës së Kampionëve, ndeshja e parë e të cilës do të luhet në Emirates.

Lexo më shumë

Kritikuesit e Ancelottit nuk kanë lidhje me futboll

Mesfushori i Chelseat, Ramires ka thënë se ata që dyshojnë në aftësitë menaxheriale të Carlo Ancelottit nuk kanë lidhje me futboll.
“Ne kemi besim në punën e tij dhe ne jemi me të. Me statistikat e tij askush nuk ka të drejtë ta kritikojë, pasi që ata që e kritikojnë nuk kanë lidhje me futboll”.
“Ne luajmë për Chelesan, për njëri-tjetrin dhe Ancelottin. Lojtarët e Chelseat e dinë se ne kemi cilësinë për të tejkaluar këtë moment të vështirë. Unë kam besim dhe lus Zotin që të rikthehemi si liderë në Ligën Premier”, u shpreh Ramires.

Lexo më shumë

Urime Viti i Ri 2011

Stafi i SportiSot, ju uron Gëzuar Vitin e Ri 2011, me shpresë se ky vit do të jetë edhe më i lumtur dhe më suksesshëm se viti që e kaluam. -Gjatë vitit 2010, SportiSot ishte faqja e cila ju informoi me ngjarjet kryesore nga bota e sportit shqiptar dhe ndërkombëtar në kategori të ndryshme, duke filluar nga sporti më i popullarizuar në botë, Futbolli, dhe me kategori të ndryshme siq janë: Basketbolli, Formula 1, Tenisi, Boksi, Atletika, Hendbolli, Motoçiklizmi, Shahu, Air Race, Hokeji mbi akull, Karateja, Mundja, Noti, Peshëngritja dhe Xhudoja. Në vitin 2010, SportiSot punoi pa u ndalur duke postuar kështu më shumë se 8200 artikuj sportiv vetëm për vizitorët kësaj faqeje.
-Pavarësisht sukseseve që arriti në vitin 2010, SportiSot kërkon të arrijë suksese edhe më të mëdha këtë vit, duke postuar edhe më shumë lajme si nga sporti shqiptar , ashtu edhe ai ndërkombëtar.

Lexo më shumë