Skuadra e Chelseat ka arritur të përmbysë avantazhin e Manchester Unitedit për të shënuar fitore prej 2-1 në derbin e të martës mbrëma të zhvilluar në Stamford Bridge.
Mysafirët e hapën ndeshjen përmes Wayne Rooneyt, i cili pranoi një top nga Nani, dhe nga një distancë prej afro 23 metrash e mposhti portierin Cech (29’). Edhe Blutë i patën rastet e tyre gjatë 45 minutave të para, mirëpo porta e Van der Sar mbeti e paprekur, ashtu që me epërsi minimale të Djajve të Kuq u mbyll pjesa e parë.
Chelsea barazoi rezultatin në pjesën e dytë përmes transferit të ri David Luiz, i cili pas krosimit të Essien dhe pas pasimit me kokë të Ivanovic, shënoi për rezultatin 1-1 (54’).
Ndërhyrjen e gabuar ndaj Yury Zhirkov, arbitri e dënoi me penallti, ndërsa Frank Lampard kaloi Chelsean në epërsi nga pika e bardhë (79’) dhe ky rezultoi të ishte goli i fitores.
Pas kësaj fitoreje, Chelsea ngjitet në pozitën e katërt me një pikë më shumë se Tottenham Hotspur.

Mohamed Sissoko nuk do të luajë më për Juventusin këtë sezon, pasi i është nënshtruar ndërhyrjes kirurgjike në gju.
Mesfushori nga Mali ka pasur probleme të vazhdueshme me gjurin e majtë, gjë që ia ka kufizuar lojën gjatë këtij sezoni.
“Këtë mëngjes Momo Sissoko i është nënshtruar artroskopisë për të rregulluar kërcin e gjurit të majtë. Trajtimi është realizuar në Bordeaux nga doktor Jambou. Kthimi i tij në aksion do të ndodhë pas tre muajsh”, shkruan në komunikatën e lëshuar nga klubi bardhezi.
Juve gjithashtu ka konfirmuar se Fabio Grosso, Hasan Salihamizic dhe Giorgio Chiellini janë në dyshim për derbin e të shtunës kundër Milanit.

Agjenti i Mario Balotellit, Mino Raiola, ka deklaruar se aktualisht nuk është në agjendë transferimi i sulmuesit te Manchester Cityt te Milani.
Sulmuesi italian është në sezonin e tij të parë te klubi anglez, ndërsa ai vazhdimisht lidhet me një kalim te Milani. Mirëpo, agjenti i tij mohon se janë duke punuar për një transferim në San Siro.
“Balotelli te Milani? Jo, kjo nuk do të ndodhë tash. Aktualisht nuk punojmë për transferimin e Mario Balotellit te Milani”, ka deklaruar Raiola, i cili ishte i pranishëm në tribuna në ndeshjen ndërmjet Milanit dhe Napolit.

Sulmuesi i Arsenalit, Robin van Persie, do të mungojë në ndeshjen kthyese të Ligës së Kampionëve kundër Barcelonës që do të zhvillohet në Camp Nou, pasi që klubi njoftoi se holandezi ka pësuar një lëndim, i cili do ta mbajë jashtë fushe për tri javë.
Kjo është një mungesë e madhe për Topçinjtë, por trajneri Arsene Wenger njoftoi se ka gjasa që kapiteni Cesc Fabregas të udhëtojë për në Spanjë.
“Fatkeqësisht, patëm lajme të këqija nga ekzaminimi dhe ai (Van Persie) sigurt do të mungojë në tri javët e ardhshme”.
“Cesc po duket se ka gjasa. Ai po përparon shpejtë dhe mirë. Është e mundur (që të luajë)”, ka thënë Wenger për faqen zyrtare të Arsenalit.

Ish-presidenti i Barcelonës, Joan Laporta, ka thënë se ishte Pep Guardiola ai që e kërkoi Zlatan Ibrahimovicin në Camp Nou.
Javën e kaluar, sulmuesi i Milanit deklaroi se kishte qenë trajneri i katalunasve që e kishte detyruar suedezin të largohej në drejtim të Italisë, ndërsa Laporta thotë se ka qenë pikërisht Guardiola që e ka detyruar skuadrën të shpenzojë 66 milionë euro për Ibran dy vjet më parë.
“Eto’o kishte vendosur të largohej, ndërsa Zlatan kërkohej nga trajneri ynë dhe ekipi teknik”.
“Unë u dhashë tre opsione: Villan, Forlanin dhe Ibrahimovicin. Ishte edhe një emër i katërt, por asnjëherë nuk u tha në media”.
“Sa i përket Eto’o-s, ai nuk dëshironte të shkojë te Valencia ose (Atletico) Madridi, kështu që zgjidhja e vetme për të ishte Interi”, ka deklaruar Laporta për Sport.es.

Sulmuesi i Chelseat, Didier Drogba, ka deklaruar se ai nuk planifikon të largohet nga Blutë përkundër se nuk ka qenë pjesë e skuadrës bazë në ndeshjet e fundit.
“Kam gjithçka që do të ëndërroja te Chelsea. Jam te një skuadër e madhe me bashkëlojtarë të shkëlqyer, me një ambient të përsosur të jetësor për familjen time”.
“Para disa vitesh do të kisha thënë: ‘Ëndërroj të luaj te Milani, Reali apo Manchester Unitedi. Por tash nuk e ndjej më atë dëshirë”.
“Jam te njëri nga klubet më të mira në botë. Këto dëshira janë zhdukur që moti”, ka thënë Drogba për televizionin francez Orange Sport.

Presidenti i Milanit, Massimo Moratti, ka thënë se fitorja e Milanit ndaj Napolit nuk do të thotë se gara për titull ka përfunduar.
Rossonerët e mposhtën me rezultat 3-0 njërin nga konkurrentët e drejtpërdrejtë për titull, duke u forcuar në krye të tabelës me pesë pikë para Interit që tash mban vendin e dytë.
“E gjithë kjo është argëtuese dhe gjërat po fillojnë të bëhen më interesante”, u ka thënë Moratti gazetarëve, ndërsa i pyetur nëse derbi milanez do ta vendoste Scudetton, ai ka thënë : “Nuk mendoj ashtu”.
Në fundjavë, Interi pret Genoan në Meazza, ndërsa Milani udhëton në Torino për t’u ndeshur me Juventusin.

Barcelona ka marrë lajme të mira nga stafi mjekësor sa i përket sfidës së të mërkurës mbrëma kundër Valencias.

Sulmuesi i Romës, Adriano, ka kërkuar falje për sjelljet e tij dhe ka premtuar se është i gatshëm për gjithçka.
Braziliani është penduar për veprimet e tij të fundit, që përfshijnë vonesën e kthimit nga Brazili dhe mosparaqitjen në një vizitë mjekësore.
“U kërkoj falje të gjithëve për gjithçka që ka ndodhur”, ka thënë Adriano për Sky Sport Italia, duke sqaruar se mosparaqitja në vizitë mjekësore kishte qenë për shkak të ndërrimit të orarit të takimit.
“Kam gabuar që nuk jam paraqitur dhe e di këtë. Isha i inatosur, por u kërkoj falje fansave dhe të gjithëve. Shpresoj të rikuperohem sa më shpejtë që t’i ndihmoj Romës”, ka shtuar sulmuesi.

Shefi ekzekutiv i Milanit, Adriano Galliani, ka thënë se nuk do të ketë rikthim të yllit të Real Madridit, Ricardo Kaka, në San Siro.
Babai i brazilianit, që është njëherit edhe agjent i tij, Bosco Leite, ishte i pranishëm në San Siro për të përcjellë ndeshjen Milan-Napoli, ndërsa gazetarët kanë spekuluar për një rikthim të lojtarit te kuqezinjtë.
“Tash për tash nuk ka hipoteza. Leite (Bosco) është një mik, sikurse djali tij, por ne nuk folëm për Riccardinon”.
“A do ta dëshiroja kthimin e tij? Nuk e di. Do të shohim. Tash duhet të mendojmë për kampionatin”, ka thënë Galliani.

Interi raportohet se do të tentojë të sjellë mesfushorin shqiptar Blerim Xhemaili në Giuseppe Meazza gjatë verës.
Trajneri Leonardo dhe zyrtarët e klubit e kanë monitoruar lojtarin e kombëtares zvicerane, i cili erdhi te Parma vitin e kaluar si huazim nga Torino, dhe Nerazzurët do të jenë të gatshëm për negociata gjatë verës.
Xhemaili, i cili u rikthye në Serie A dy vite më parë pasi dështoi të shkëlqejë në Ligën Premier me Boltonin për shkak të lëndimeve, raportohet se vlen rreth 6 milionë euro.

Sulmuesi i Barcelonës, David Villa, ëshët i gatshëm të përballet me ish-klubin e tij gjatë ndeshjes së nesërme.
Kjo do të jetë hera e parë që Villa rikthehet në Mestalla që nga transferimi i tij në Camp Nou gjatë verës.
“Ndeshja kundër Valencias do të jetë një prej më të vështirave në ligë, por do të jetë mrekulli për mua të shkoj atje pas të gjithë asaj kohe të shkëlqyeshme që kam kaluar atje”, ka thënë sulmuesi spanjoll.
Barcelona aktualisht është lider në tabelën e La Liga me shtatë pikë diferencë nga ndjekësi i parë, Real Madridi.

Menaxheri i Chelseat, Carlo Ancelotti, thotë se ndeshja ndaj Manchester United do të jetë vendimtare për shpresat e tyre për përfundim në top katërsh.
“Është një ndeshje e rëndësishme për ta, për ne, për të ardhmen e Manchester United dhe për të ardhmen e Chelseat. Ne jemi të ngazëllyer që do të luajmë këtë ndeshje. Ne arrijmë në këtë ndeshje në një moment të mirë. Ne kemi vetëbesim për të dhënë më të mirën dhe për ta fituar ndeshjen. Nuk do të jetë e lehtë”.
“United ka qenë, deri tash, ekipi më i mirë në Ligën Premier. Për ne është e rëndësishme të fitojmë jo vetëm për rezultatin por edhe për të ngritur vetëbesimin tonë pas fitores ndaj Kopenhagës, ku ne luajtëm shumë mirë”, ka thënë Ancelotti.

Kapiteni i Interit, Javier Zanetti, ka refuzuar të kritikojë ish-trajnerin e ekipit Rafa Benitez.
Fitorja 2-0 e të dielës ndaj Sampdorias e ka ngritur Interin në pozitën e dytë prapa liderit të ligës, Milanit.
“Ne kishim të njëjtën qasje me Benitez. Por ishin 11 ose 12 lëndime të rënda, të cilat i komplikuan gjërat. Sapo u kthyem në fuqinë e plotë, ne ia dolëm mirë. Pastaj ne humbëm kontrollin”.
“Leo ka sjellë entuziazmin te ne. Por ne e dimë se gjithçka varet nga ne. Nëse besojmë në vete se mund t’i arrijmë të gjitha objektivat, edhe pse do të jenë ndeshje të vështira ato kundër Napolit dhe Milanit”, ka thënë Zanetti.

Gigi Buffon thotë se Gigi del Neri duhet të mbetet në drejtim të Juventusit deri gjatë verës.
Stoli i Del Nerit është duke u lëkundur pas rezultateve të dobëta që po kalojnë Biankonerët së fundi, por portieri i Juves mendon se trajneri duhet të qëndrojë së paku deri në qershor.
“Është e drejtë që Del Neri të mbetet deri në qershor. Pastaj në fund të sezonit, klubi mund të vlerësojë gjithçka – përfshirë situatën e parave”, ka thënë Buffon.

Trajneri i Napolit, Walter Mazzarri, nuk pranon të heqë dorë nga lufta për kreun e tabelës së Serie A pas humbjes 3-0 në Milano.
Napoli mori një goditje në shpresat për titull pasi golat e shënuar nga Zlatan Ibrahimovic, Kevin-Prince Boateng dhe Alexandre Pato i dhanë Milanit fitoren 3-0.
“Milani është një ekip i fenomenëve dhe ata na ndaluan të luajmë. Deri në momentin e penaltisë ndeshja ishte e ekuilibruar, pastaj gjërat ndryshuan. Ne u munduam të bëjmë diçka në pjesën e dytë, por nuk mundëm”.
“Ne lamë shumë hapësirë për Pato dhe Ibrahimovic, të cilët e mbyllën ndeshjen. Por, kjo nuk ka rëndësi, ne e kemi humbur këtë finale, por ne duhet të shohim në pjesën e mbetur [të sezonit]”, ka thënë Mazzarri për Sky Sport Italia.

Jack Wilshere ka premtuar se e ardhmja e tij afat-gjate është e lidhur me Arsenalin.
“Edhe pas 10 vitesh kohë unë ende dua të jem te Arsenal, duke fituar trofe për klubin tim dhe po ashtu për ekipin kombëtar”.
“Unë jam te Arsenali që kur kam qenë nëntë apo dhjetë vjeçar. Duket sikur kam qenë këtu gjithmonë. Klubi ka qenë i shkëlqyeshëm për mua dhe unë ndjehem në borxh të jem këtu”, ka thënë Wilshere.
Mesfushori gjithashtu ka lavdëruar menaxherin Arsene Wenger që i ka dhënë atij shansin të luajë në Emirates këtë sezon.

Bosi i Chelseat, Carlo Ancelotti, thotë se Djajtë e Kuq meritojnë të jenë liderë të Ligës Premier për shkak të qëndrueshmërisë së tyre.
Të dy klubet përballen në derbin që ishte anuluar në muajin dhjetor për shkak të motit të keq në ishull.
“Ata kanë luajtur me një qëndrueshmëri. Ata kanë humbur vetëm një lojë në ligë dhe janë duke luajtur të fokusuar, të përqendruar. Kjo është arsyeja se pse ata janë në krye të tabelës”, ka thënë Ancelotti.

Sulmuesi i Chelseat, Fernando Torres, thotë se ai preferon të sfidohet nga lojtarë të mirë dhe shton se është i sigurt se do të jetë fitues në duel me mbrojtësin dhe kapitenin e Manchester United, Nemanja Vidic,
Vidic dy herë është dërguar jashtë loje kur ka luajtur kundër spanjollit dhe do të jetë pa shokun e tij të mbrojtjes, Rio Ferdinand, në Stamford Bridge.
“Ju doni të luani mirë kundër lojtarëve të tillë për të treguar se mund ta bëni këtë, dhe Vidic dhe Ferdinand kanë qenë gjithmonë një sfidë e madhe për mua, andaj shpresova se ata do të mund të luajnë të dy”.
“Disa njerëz preferojnë lojtarët e mëdhenj të mos luajnë kundër tyre, por unë preferoj të luaj kundër këtyre lloj lojtarëve”, ka thënë Torres.