Klitschko: Do t’ia mbylli gojën Hayes

Wladimir Klitschko është zotuar se do t’ia mbyllë përfundimisht gojën rivalit të tij më të madh, David Haye, kur të përballet me të në ring të shtunën në Imtech Arena të Hamburgut.
Klitschko nuk u tremb fare për ta kërcënuar britanikun edhe pse në qendër të Hamburgut, saktësisht në qendrën tregtare Karstadt ku ishte bërë matja zyrtare u mblodhën me mijëra britanikë.

“Unë jam quajtur njeri i vdekur më parë. Por ky njeri i vdekur vazhdon të ecë. Dhe e dini si? Është në rregull kur Haye flet dhe prezanton veten. Unë definitivisht do të kënaqem në atë luftë. Unë jam përfshirë në gjithë këtë që dy vjet, sa Haye ka qenë këtej pari, duke folur shumë, ndërsa tani është koha t’u japim fund fjalëve”, ka thënë ukrainasi.

Lexo më shumë

Haye: Është koha për të fituar

Boksieri britanik, David Haye, ka deklaruar në matjen zyrtare të peshës para kundërshtarit Wladimir Klitschko se ai do të triumfojë në duelin e të shtunës.
“Kjo është ndeshja më e madhe në boks, shumë e thjeshtë. Mendoj se ndeshja e vetme që mund ta arrijë të njëjtën eufori është ajo mes Floyd Mayweather dhe Manny Pacquiao. Sigurisht për arsye të ndryshme ndeshja e tyre nuk u zhvillua kurrë dhe nuk do të ndodhë as këtë vit, kështu që dueli të cilin unë do ta fitoj do të jetë më i madhi që do ta kemi para ndonjëherë”.

“Unë jam aq krenar të jem i përfshirë në të dhe të jem njeriu që do ta rrëzojë në tokë atë, të jem njeriu kryesor, në majen e kategorisë së rëndë. Mendoj se të jem kampion i të gjithë titujve në kategorinë e rëndë është maja e sportit dhe unë mezi pres që t’i marr titujt që unë i meritoj”, ka thënë Haye.

Lexo më shumë

Barca heq dorë nga Rossi

Barcelona përfundimisht ka hequr dorë nga mesfushori i Villarrealit, Giuseppe Rossi, gjithnjë sipas agjentit të italianit, Federico Pastorello.
”Është një marrëveshje që kurrë nuk do të arrihet. Ne jemi duke shqyrtuar disa opsione për të ardhmen e Rossit, por nuk mund ta përjashtojmë mundësinë e qëndrimit të tij te Villarreali”.

“Sa do të kushtojë? Vlera e tij është e një top lojtari...”, theksoi Pastorello për Sky Italia.

Lexo më shumë

Arsenali, ofertë shokuese për O’Shea

Arsenali është duke e konsideruar një ofertë shokuese për mbrojtësin e Manchester United, John O’Shea.
Mirror shkruan se 30 vjeçarit O’Shea i ishte thënë se mund të largohet nga Manchester United pas 12 viteve qëndrimi.

Dhe këtë rast nuk dëshiron ta lë pa e shfrytëzuar Arsene Wenger, që ka nevojë për përvojë dhe për hakmarrje, kur dihet mjaft mirë se United po e detyron pikërisht francezin ta shesë asin Samir Nasri.

Lexo më shumë

Zamparini: Chelsea ofroi 45 milionë për Pastoren

Presidenti i Palermos, Maurizio Zamparini, ka konfirmuar se Chelsea ka bërë një ofertë prej 45 milionë funtesh për asin argjentinas, Javier Pastore.
“Pastore është lojtar fenomenal dhe janë tri-katër klube të interesuara për të. Unë jam biznesmen dhe nuk do ta humb ftohtësinë, por është e qartë se klubet që e duan Pastoren duhet të jenë ekonomisht të fuqishme”.

”Chelsea është një prej klubeve të interesuara, ata tashmë kanë bërë ofertë prej 45 milionë funtesh”, citohet të ketë thënë Zamparini nga Daily Mail.

Lexo më shumë

Messi ju shkatërron nëse i jepni hapësirë

Mbrojtësi i Bolivisë, Ronald Raldes, ka etiketuar Lionel Messin si kërcënimin më të madh në sulmin e Argjentinës derisa dy ekipet pritet të përballen sonte në takimin hapës të Copa America.
“Do të jetë vështirë! Ai [Messi] është një lojtar i paparashikueshëm të cilit nuk mund t’i jepni hapësirë. Duhet të qëndrojmë afër tij. Këtu ka më shumë mbulesë dhe kontakt fizik se në ndeshjet në Evropë, por nuk mendoj se kjo do të ndikojë në performancën e Messi”.

“Kurdo që përballeni me të, nëse i jepni atij hapësirë ai do t’ju shkatërrojë me lehtësi. Por ne nuk mund të bëjmë gabime duke menduar se duhet ta përcjellim vetëm Messi, ata të gjithë janë të rrezikshëm”, ka thënë Raldes.

Lexo më shumë

Ferguson urdhëron blerjen e Nasrit

Sir Alex Ferguson ka kërkuar që transferimi i mesfushorit të Arsenalit, Samir Nasri te Manchester United të konkretizohet sa më shpejtë që është e mundur.
Daily Star raporton se Ferguson ka urdhëruar drejtuesit në Old Trafford që ta finalizojnë transferimin e Nasrit për 22 milionë funtesh para fillimit të turneut në SHBA.

“United dëshiron ta transferojë Nasrin sa më shpejtë që është e mundur. Ai ka qenë cak që disa muaj dhe menaxheri dëshiron që marrëveshja të jetë e mbyllur para turneut në SHBA”, theksoi një burim i tabloidit.

Lexo më shumë

Berlusconi e ëndërron Iniestan te Milani

Pier Silvio Berlusconi, djali i presidentit të Milanit Silvio, ka shprehur dëshirën për ta parë një ditë Andres Iniestan në San Siro.
Berlusconi jr. nuk është aspak i frikësuar që të flasë për politikën transferuese të Milanit, përderisa ka zbuluar ëndrën e tij.

“Ne po flasim për ëndrra dhe unë nuk e kam problem që ta zbuloj timen. Ëndrra ime personale është që Milani ta transferojë Iniestan. Ai është mesfushor i nivelit të lartë që luan në një ekip fantastik. Barcelona ka mesfushën më të mirë dhe Iniesta luan rol të maadh në të”, theksoi Pier Silvio për Il Corriere dello Sport.

Lexo më shumë

Zyrtare: Juve nënshkruan me Lichtsteiner

Juventusi ka zbuluar se ka transferuar Stephan Lichsteiner nga Lazio për 10 milionë euro.
Gjiganti italian ka konfirmuar transferimin me anë të një publikimi në faqen zyrtare, ku thuhet se mbrojtësi zviceran ka nënshkruar kontratë katërvjeçare.

“Klubi futbollistik Juventus bën të ditur se ka përmbyllur marrëveshjen me klubin Lazio për të transferuar Stephan Lichtsteiner për 10 milionë euro, e cila do të paguhet brenda tre vitesh. Juventusi ka nënshkruar kontratë katërvjeçare me lojtarin”, thuhet në deklaratën e klubit nga Torino.

Transferimi ka qenë cak i negociatave mes dy klubeve të cilat kanë zgjatur për dy javë, pasi klubi nga Roma kërkonte 12 milionë euro, por marrëveshja tash është kompletuar dhe Lichtsteiner i bashkohet dy arritjeve të reja në Torino, Andrea Pirlo dhe Reto Ziegler.

Lexo më shumë

Skudeto e vitit 2006 i mbetet Interit

Juventusi ka humbur edhe shpresën e fundit për të rikthyer Scudetton e vitit 2006, pasi Federata Italiane e Futbollit (FIGC) ka vendosur që ajo të mbetet me Interin, raportojnë mediat italiane.
Juventusi dërgoi dokumentet zyrtare te FIGC në maj të vitit 2010 duke kërkuar rikthimin e titullit të vitit 2006, i cili iu mor Biankonerëve pas skandalit të montimit të ndeshjeve, Calcipoli.

Bazë e tyre ishin dëshmitë e hulumtimit që është duke vazhduar rreth Calcipoli 2 në Napoli, ku dyshohet se edhe disa ekipe të tjera, përfshirë Interin, kishin qenë të përfshira në skandalin e vitit 2006, edhe pse kjo nuk ishte dëshmuar në rastin e parë.

Juventusi besoi se dëshmitë ishin të mjaftueshme për të rikthyer në shqyrtim vendimin e pesë viteve më parë, duke shpresuar edhe se atyre do të mund t’u kthehet titulli.

Megjithatë pas 14 muajsh kërkime është bërë e ditur se ankesa e Juventusit është e pambështetur dhe kështu Skudeto e vitit 2006 do t’i mbetet Interit.

Lexo më shumë

Zyrtare: Xhemaili nënshkruan me Napolin

Mesfushori shqiptar nga Maqedonia, Blerim Xhemaili, ka kompletuar transferimin e tij te Napoli.
Lajmin e ka bërë të ditur klubi italian me anë të një deklarate në faqen zyrtare në internet, ku thotë se Xhemaili ka nënshkruar kontratë afatgjate me klubin e tij të ri.

Napoli, që në sezonin e ri do të garojë në Ligën e Kampionëve, dëshironte të përforcojë ekipin pas largimit të Michele Pazienza drejt Juventusit dhe trajneri Walter Mazzarri tashmë ka fituar përforcimin e kërkuar.

“Vërtet kam dashur të transferohem te Napoli. Klubi ka shumë ambicie dhe ka një projekt të rëndësishëm që vazhdon. Ekipi është shumë i fuqishëm, ka një trajner të shkëlqyeshëm dhe tifozët janë të mahnitshëm. Jam shumë i lumtur me këtë transferim”, ka thënë Xhemaili për faqen zyrtare të klubit.

25-vjeçari i cili mbron ngjyrat e përfaqësueses së Zvicrës në futboll, ka luajtur për klube si Zurich, Bolton, Torino dhe Parma.

Lexo më shumë

Carragher shpreson në më shumë transferime

Zëvendëskapiteni i Liverpoolit, Jamie Carragher, shpreson se klubi do të jetë më aktiv në tregun e transferimeve dhe do të sjellë më shumë talentë të ri në Anfield në javët në vazhdim.
Deri tash Kenny Dalglish në këtë afat kalimtar ka sjellë vetëm mesfushorin U-21 të Anglisë, Jordan Henderson, nga Sunderland.

Por pas dështimit të transferimit të Connor Wickham dhe Gael Clichy dhe duke marrë parasysh transferimet e bujshme të Manchester United, si Phil Jones, Ashley Young dhe David De Gea, ka një ndjenjë në mesin e fansave se klubi po ngec prapa në transferime. Por Carragher shpreson se gjithçka do të zhvillohet në javët e ardhshme.

“Ende është shumë herët dhe unë nuk kam pritur shumë gjëra të ndodhin në transferime deri tash. Gjatë verës lojtarë, menaxherë, drejtorë ekzekutivë dhe pronarë, janë të gjithë në pushime. Është vetëm fillimi i korrikut dhe me para-sezonin që fillon në javën e ardhshme jam i sigurt se gjërat do të fillojnë të lëvizin së shpejti”.

“Shpreson se do ndodhin gjëra në javët e ardhshme dhe se do të sjellim disa fytyra të reja. Klubi tash është i fokusuar në lojtarë të rinj dhe mendoj se kjo është rruga e duhur për klubin. Ju dëshironi ta zhvilloni ekipin dhe të keni lojtarë në klub për një kohë të gjatë. Mendoj se kjo qasje vërtetë do të na ndihmojë neve”, ka thënë Carragher.

Lexo më shumë

Wimbledon - Nadal i gatshëm për gjysmëfinale

Në prag të përballjes gjysmëfinale me Andy Murray, Rafael Nadal ka thënë se ai nuk do të pengohet nga lëndimi i këmbës.
Spanjolli dëmtoi këmbën e majtë gjatë fitores ndaj Juan Martin Del Potro në rundin e katërt, dhe edhe pse skenimi tregoi se ai nuk ka ndonjë lëndim serioz, ai kishte nevojë për injektimi kundër dhimbjes para ndeshjes çerekfinale me Mardy Fish.

Megjithatë Nadal, i pari në botë, ka thënë se ai do të jetë plotësisht i gatshëm të përballet në gjysmëfinale me numrin katër të botës, Murray, për të dytin vit radhazi.

“Nuk shqetësohem për asgjë tash pasi e di se çfarë po ndodh. Me anestetikë nuk ndjej asgjë, nuk e ndjej dhimbjen”, ka thënë Nadal.

Nadal mposhti Murrayn vitin e kaluar po në gjysmëfinale para se të sigurojë titullin kundër Thomas Berdych.

Lexo më shumë

City afër transferimit të Nasri dhe Clichy

Manchester City raportohet se është afër t’ia marrë Manchester United nga dora mesfushorin e Arsenalit Samir Nasri.
Mesfushori është lidhur me një largim nga Emirates këtë verë, ndërsa destinacioni i tij i ardhshëm është përfolur Manchester United. Megjithatë duket se rivali lokal i Djajve të Kuq, City, ka bërë hapa më konkret në transferimin e francezit.

Sky Sports bën të ditur se City është në negociata me Arsenalin për të transferuar dy lojtarë të këtij ekipi, Samir Nasri për 20 milionë funte dhe Gael Clichy për shtatë milionë funte.

Që të dy nuk pranojnë të vazhdojnë kontratën me Arsenalin për të cilën gjë klubi londinez është i detyruar t’i shesë, para se ata të largohen si agjentë të lirë në fund të sezonit të ardhshëm.

Nga Arsenali këtë verë pritet të largohet edhe kapiteni Cesc Fabregas, për të cilin Barcelona së fundi bëri një ofertë të dytë të përmirësuar, pasi e para në vlerën e 30 milionë eurove u refuzua nga klubi anglez.

Lexo më shumë

Tottenhami pas Rossit

Tottenhami është i gatshëm të provojë për të transferuar sulmuesin e Villarrealit, Giuseppe Rossi.
Daily Mail shkruan se Spursat kanë ringjallur interesimin në italianin pasi agjenti i tij tha se një transferim te Barcelona tashmë ishte jashtë loje.

Megjithatë, menaxheri Harry Redkanpp do të duhet të luftojë me Atletico Madrid që po ashtu ka shënjestruar Rossin si zëvendësim për Sergio Aguero i cili është duke u lidhur me një kalim te Juventus, Real Madrid dhe Chelsea.

Lexo më shumë

Zanetti: Argjentina synon të luajë si Barca

Mbrojtësi i Argjentinës, Javier Zanetti, ka thënë se Barcelona është ekipi më i mirë në botë dhe ka shtuar se ai dëshiron që kombëtarja e tij në Copa America të luajë në stil të ngjashëm me atë të klubit katalanas.
37-vjeçari do të udhëheqë ekipin e tij në këtë garë e cila zhvillohet pikërisht në Argjentinë dhe e cila fillon sonte me takimin ndaj Bolivisë.

“Barcelona është ekipi më i mirë në botë. Ata kanë treguar klas për tashmë disa vite. Me ekipin kombëtar ne tentojmë të luajmë ashtu. Sigurisht, ne kemi lojtarë të tjerë dhe nuk synojmë të jemi krejtësisht si ta”, ka thënë Zanetti për EFE.

Lexo më shumë

Arsenal kthen fokusin kah Baines

Arsenali është duke u lidhur me një ofertë për mbrojtësin e Evertonit, Leighton Baines, bën të ditur The Sun.
Topçinjtë janë afër ta shesin mbrojtësin e majtë francez Gael Clichy te Manchester City për një shumë prej afro 7 milionë funte.

Largimi i Clichy do të ishte një goditje e madhe për Arsenalin që është duke kërkuar t’u kthehet trofeve pas gjashtë sezoneve pa to.

Megjithatë për të mbuluar pozitën e tij Arsene Wenger do të mundohet të transferojë mbrojtësin e kombëtares angleze Baines. Një ofertë zyrtare pritet të përgatitet në javët në vazhdim.

Lexo më shumë

Higuan: Dua trofe me Real Madridin

Sulmuesi i Real Madridit, Gonzalo Higuan, e ka bërë të qartë se ai nuk ka synime të largohet nga Santiago Bernabeu në një të ardhme të afërt dhe ka shtuar se dëshiron të fitojë edhe shumë trofe me gjigantin spanjoll.
“Dëshira ime është të qëndroj te Real Madridi. Ndjehem i dashur nga fansat dhe dua të fitoj sa më shumë trofe me këtë klub. Nuk ka asgjë më mirë se të luash në njërin prej klubeve më të mëdha në botë”.

“Jam shumë i lumtur te Real Madridi. Është e qartë se duhet të punoni fuqishëm për t’u bërë dhe për të mbetur një prej lojtarëve të rregullt të ekipit të parë në një klub si ky. Gjithmonë ka shumë konkurrencë për vende. Jam i kënaqur që kam shansin të luaj me yjet më të mëdha këtu dhe dua të vazhdoj të fitoj gjëra”, ka thënë Higuain.

Argjentinasi iu bashkua Real Madridit nga River Plate në janar të vitit 2007 dhe që atëherë ka bërë 200 paraqitje.

Lexo më shumë

Gattuso nuk largohet nga Milani

Mesfushori i Milanit, Gennaro Gattuso, ka ripërsëritur se ai nuk ka synime të largohet nga klubi gjatë kësaj vere.
Me vetëm edhe një vit të mbetur në kontratën e tij, Gattuso është përmendur si një përforcim i mundshëm për klubin rus Anzhi Makhachkala që i ofroi një marrëveshje joshëse italianit.

Në fillim të qershorit Gattuso tha se kishte refuzuar një ofertë nga Anzhi dhe tash thotë se është i lumtur te kampionët e Serie A.

“Kam edhe një vit më shumë në kontratën time dhe Milani është shtëpia ime, klubi ku ndjehem mirë. Agjenti im nuk mund të vendosë vetë, gjithmonë kalon përmes meje: përsëris, unë jam mirë te Milani”, ka thënë Gattuso për Sky Sport24.

Lexo më shumë

Gervinho: Po i bashkohem Arsenalit

Sulmuesi i Lille, Gervinho, thotë se ai po transferohet te Arsenali.
Topçinjtë janë duke kërkuar përforcime si në repartin sulmues po ashtu edhe në atë mbrojtës. Gervinho është një prej të kërkuarve të Arsenalit dhe pritet të arrijë për 11 milionë funte nga Lille, shkruan The Sun.

24-vjeçari është zotuar të ndihmojë Topçinjtë t’i japin fund mungesës gjashtëvjeçare të titujve.

“Kam zgjedhur Arsenali pasi është një grup i ri brenda të cilit do të jem në gjendje të integrohem me lehtësi. Mund të zhvillohem më shumë atje. Ka vetëm disa detaje të mbetura”.

“Rrezik? Jo aspak. Do të luaj për Arsenalin. Rreziku më i mirë për t’u marrë është të shoh të shënoj gola dhe të luaj shumë. Në futboll ju duhet të merrni rreziqe nëse dëshironi të fitoni. Unë do shkoj te Arsenali të fitoj”, ka thënë Gervinho.

Oferta e parë e Wenger në vlerën e 7.2 milionë funteve është refuzuar nga klubi francez, por një marrëveshje e re pritet të arrihet në ditët në vazhdim. Lojtari tashmë ka gjetur marrëveshje për kushtet personale dhe do të nënshkruajë kontratë katërvjeçare e cila do t’i sjellë 60 mijë funte në javë.

Lexo më shumë

Liverpooli në kontakt me Chivu

Mbrojtësi i Interit, Cristian Chivu, ka joshur interesimin e Liverpoolit.
Me cakun kryesor të Redsave, Gael Clichy, i cili është në rrugë për t’u transferuar te Manchester City, Kenny Dalglish mund të kthejë vëmendjen kah mbrojtësi rumun.

Chivu ka edhe një vit të mbetur në kontratë dhe do të dëshironte të qëndrojë te Inter, por është i pasigurt nëse ai është në planet afatgjate të menaxherit të ri, Gian Piero Gasperini.

Përveç Liverpoolit për Chivu të interesuar janë edhe Valencia dhe Napoli.

Lexo më shumë

Shqiptarët fitojnë në rrethin e parë

Të gjitha klubet shqiptare kanë tejkaluar me sukses ndeshjet e para në rrethin e parë kualifikues për Europa League. Është fjala për dy ekipe nga Shqipëria, Flamurtari e Vllaznia, dhe një tjetër nga Maqedonia, Renova.
Vllaznia shënoi fitore fitore minimale në udhëtim te Birkirkara me rezultat 1-0 me golin e shënuar nga Sykaj në minutën e dytë, që ishte dhe goli i vetëm i ndeshjes.

Renova e Tetovës në shtëpi shënoi fitore prej 2-1, që sadopak i jep një avantazh të vogël skuadrës shqiptare para ndeshjes kthyese në udhëtim. Janchevski kaloi në epërsi nga penaltia shqiptarët (14’), para se Nixon ta barazonte rezultatin (45’). Bajrami tre minuta pa përfunduar sfida (87’) realizoi për fitoren e madhe të tetovarëve.

Dhe befasia më e madhe e xhiros së parë të rrethit të parë kualifikues për Europa League ishte Flamurtari, që shënoi fitore të jashtëzakonshme në transfertë te Buduçnosti. Shehaj kaloi në epërsi klubin shqiptar (23’) para se Boskovic të barazonte shifrat (53’). Një autogol i Radulovic (62’) dhe një gol nga penaltia i Sakajt (64’) ia garantuan një ndeshje kthyese të qetë në shtëpi Flamurtarit, me këtë fitore prej 3-1.

Kështu, në ndeshjet kthyese edhe Renova, edhe Vllaznia por edhe Flamurtari kanë gjasa të mëdha kualifikimi në rrethin e dytë, ku do t’i presin kundërshtarë më të vështirë. Sidoqoftë, ka gjasa të mëdha të shohim një klub shqiptar në edicionin e sivjetmë të Europa League.

Lexo më shumë