Edhe Eto’o arrin marrëveshje me Interin

Sulmuesi i Barcelonës, Samuel Eto'o, më në fund ka arritur marrëveshje me Interin, siç ka bërë të ditur vetë agjenti i sulmuesit.
Kamerunasi raportohet se do të nënshkruajë marrëveshje pesëvjeçare me kampionin e Serie A, dhe do të marrë pagë vjetore prej 10 dhe 10.5 milionë eurosh. Eto’o në Barcelona do të shoqërohet edhe nga Alexandr Hleb, derisa në drejtim të kundër do të lëvizë Zlatan Ibrahimovic, për të cilin Barcelona do të paguajë edhe një shumë prej 40 deri në 50 milionë euro. “Është kryer. Kemi arritur marrëveshje me Interin. Samuel ka biseduar me Mourinhon dhe është shumë i lumtur që do të veshë fanellën zikaltër. Të gjitha detajet janë qartësuar. Ka një harmoni të plotë mes nesh dhe klubit. Jemi shumë të lumtur dhe të kënaqur. Marrëveshja është arritur dhe javën e ardhshme ai do të fillojë të angazhohet me Interin”, ka thënë agjenti i lojtarit, Jose Maria Mesalles. 28-vjeçari, i cili iu bashkua Barcelonës në vitin 2004, kishte vetëm edhe një vit të mbetur në kontratën e tij. Ai ishte golashënuesi më i mirë i Barcelonës në sezonin e fundit me 34 gola të shënuar.