Conte: Të jemi krenarë që po luftojmë për titull

Trajneri i Juventusit, Antonio Conte, u ka thënë lojtarëve të tij se duhet të jenë krenarë për suksesin e arritur deri më tani këtë sezon.

Dy javë pa përfunduar Serie A, Bianconerët gjenden në krye të tabelës me një pikë më shumë se Milani dhe me fitore në dy ndeshjet e mbetura do të shpalleshin kampionë.

“E gjithë kjo është falë punës së bërë nga klubi, stafi dhe lojtarët. Duhet të jemi përplot krenari që po garojmë për titull dy ndeshje pa përfunduar (kampionati), dhe kjo duhet të na motivojë më shumë”.

“Futbolli gjithmonë sjell ndjesi të reja dhe ajo që ka rëndësi është e tashmja. Duam të arrijmë diçka të jashtëzakonshme. Unë gjithmonë them se për të fituar duhet tru, zemër dhe këmbë, në këtë renditje”, ka deklaruar Conte në konferencën për media para ndeshjes ndaj Cagliarit.

Category: Futboll