Pato: Milani është ekip fituesish

Alexandre Pato është i bindur se Milani ka gjithçka çfarë nevojitet për të luftuar për shpërblimet kryesore në sezonin 2012/13.

Rossonerët do të jenë pa lojtarët e famshëm si Alessandro Nesta, Thiago Silva, Gennaro Gattuso, Clarence Seedorf dhe Zlatan Ibrahimovic, por Pato beson se ata do të jenë në gjendje t’ia dalin pa ta dhe të luftojnë për Scudetton.

“Milani gjithmonë ka qenë ekip fituesish, edhe pasi ata humbën disa prej lojtarëve me profil të lartë. Jam i bindur se ne mund të luftojmë për Scudetton sërish. Ne jemi të fuqishëm në çdo pozitë dhe jam i bindur se do t’ia dalim mirë”.

“Ibra është një kampion i madh dhe ai ka bërë gjëra të mira për klubin. Megjithatë, mendoj se ne mund t’ia dalim me largimin e tij”, ka thënë braziliani për Gazzetta dello Sport.

Milani e fillon sezonin e ri në Serie A më 26 gusht me ndeshjen si nikoqir i Sampdorias.

Category: Futboll