Balotelli bën gati kthimin në Milano
Përforcimi i rëndësishëm i janarit për Milanin nuk do të jetë Ricardo Kaka, por Mario Balotelli. Ndonëse Adriano Galliani e ka hedhur poshtë plotësisht si mundësi, mediat angleze kanë bërë të qartë se sulmuesi italian ka filluar të bëjë gati gjërat për kthimin në Itali.
Gazeta “The Sun” ka zbuluar se lojtari ka njoftuar pronarët e shtëpisë që ka me qira në Mançester se do të largohet, ndërsa ka blerë shtëpi në Milano dhe ka filluar të transportojë gjërat e tij drejt Italisë.
Jo rastësisht, menaxheri i lojtarit, Mino Raiola, ka qenë në Itali gjatë ditëve të fundit dhe është takuar me drejtuesit e Milanit, duke biseduar për të ardhmen e sulmuesit. Edhe pse Balotelli u cilësua “mollë e kalbur” nga Silvio Berluskoni, presidenti i Milanit duket qartësisht që ka ndërruar mendje dhe po bëhet gati të pranojë një shpenzim të rëndësishëm prej 26-28 milionë eurosh për të kthyer në Milano sulmuesin e përfaqësueses italiane.
Vetë Balotelli ka një të kaluar te Interi, por nuk ka fshehur kurrë faktin se që fëmijë është një tifoz i Milanit dhe një fakt të tillë e ka treguar edhe kur është shfaqur disa herë në “San Siro” për të ndjekur ndeshjet e kuqezinjve.
Te Manchester Siti, të gjitha hapësirat për të janë mbyllur, me Aguero e Tevez që përbëjnë dyshen titullare të sulmit të kampionëve të Anglisë, ndërsa është kaluar edhe nga Edin Dzeko në zgjedhjet e trajnerit Mancini, i vetmi që e ka mbrojtur për kaq shumë kohë, por që më në fund është i lumtur ta shohë të largohet.
Category: Futboll
