Beckham: Qëndrimi te Milani nuk është i përhershëm

David Beckham i ka siguruar tifozët e LA Galaxy se ai do të kthehet sërish te klubi, pasi të përfundojë qëndrimin në formë huazimi te Milani.

Mesfushori anglez do të luajë për Rossonerët nga afati kalimtar i janarit, ashtu që të sigurojë një vend te përfaqësuesja e Anglisë në formacionin e Fabio Capellos që do të udhëtojë në Afrikën e Jugut për Kampionatin Botëror 2010.

“Asnjëherë nuk kam menduar që të largohem përgjithmonë nga SHBA-të dhe të kthehem në Evropë. Jam i lidhur me MLS, me pronarin e Galaxy, Leiweke, dhe me gjithë të tjerët. Gjithmonë kam thënë se do të ndihmoj”, është cituar Beckham nga Sportmediaset.

Pellegrini: Rauli vazhdon të jetë i rëndësishëm

Trajneri i Real Madridit, Manuel Pellegrini, ka thënë se ikona e klubit, Raul, ka ende rol të rëndësishëm te Los Blancos, duke mohuar spekulimet se kapiteni nuk bën pjesë në planet e trajnerit kilian.

“Ka arsye të ndryshme që ai nuk luan- për shkak të paraqitjeve jo të mira ose pasi që të tjerët po luajnë më mirë”.

“Raul është një lojtar i rëndësishëm për shkak të qëndrimit të tij- ai është në nivel të ngjashëm me ata që po luajnë, dhe padyshim që do ta sigurojë vendin e tij në disa nga ndeshjet e radhës”, ka thënë Pellegrini për AS.

Valdano: Duhet të kemi durim për Ronaldon

Drejtori gjeneral i Real Madridit, Jorge Valdano, ka thënë se klubi nuk do të rrezikojë me Cristiano Ronaldon derisa ai të jetë rikuperuar plotësisht.
“Ai është në rrugë të mbarë, mirëpo ne do të kemi durim me të, ashtu që lojtari të mos shqetësohet”, ka thënë Valdao për Marca. Edhe pse portugezi është rikuperuar nga lëndimi, trajneri Manuel Pellegrini nuk e ka përfshirë në listën e lojtarëve që do të luajnë kundër Racing Santanderit. Pritet të shihet nëse Ronaldo do të luajë në ndeshjen kundër Cyrihut në Ligën e Kampionëve, ashtu që të jetë i gatshëm për superderbin ‘el Clasico’.

Mercedesi e dëshiron Schumacherin

Skuderia e Mercedesit, e cila e ka blerë Brawn GP, e dëshiron shtatë-herë kampionin e botës në Formula 1, Michael Schumacher, që të jetë piloti kryesor. Lajmin e ka bërë të njohur eksperti i BBC Sport, Eddie Jordan.
“Kjo mundësi është ndjekur vazhdimisht dhe besoj se do të ndodhë”, thotë Jordan. Ndërkohë, zëdhënësja e Schumacherit, Sabine Kehm, ka thënë për BBC Sport se rikthimi i legjendës gjermane në pistë vështirë se mund të ndodhë, “mirëpo kurrë mos thuaj kurrë”. Nëse kjo ndodh, atëherë Schumacheri do të ribashkohej me bosin e Mercedes GP, Ross Brawn, i cili ishte truri i shtatë titujve të gjermanit te Benetton dhe Ferrari.

Një muaj moslojë për Trezeguet

Juventusi do të duhet të luajë pa David Trezeguet për një muaj, pasi është lënduar të enjten në fushën stërvitore.
Ekzaminimet mjekësore kanë treguar se Trezegol ka lënduar pulpën e këmbës dhe si rezultat i kësaj do të mungojë 30 ditë, ku përfshihet edhe derbi kundër Interit. Juve ka lëshuar një deklaratë zyrtare ku thuhet se pas analizave të stafit mjekësor, të premten është vendosur që sulmuesi i francez nuk do të jetë në gjendje të luajë për një muaj. Ky nuk është një lajm që i pëlqen trajnerit Ciro Ferrara, duke qenë se edhe Vincenzo Iaquinta është i lënduar. Ndërsa fatmirësisht për të, këtë fundjavë pritet rikthimi i ikonës, Alessandro Del Piero.

Henry: Zgjidhja më e drejtë, përsëritja e ndeshjes

Sulmuesi i Barcelonës, Thierry Henry, të premten ka lëshuar një deklaratë ku thotë se zgjidhja më e mirë në lidhje me ndeshjen e dytë kualifikuese, ndërmjet Francës dhe Irlandës, do të kishte qenë përsëritja e ndeshjes.
Henry ishte i përfshirë në momentin vendimtar të ndeshjes, duke ndalur topin me dore dhe duke ia pasuar William Gallasit, i cili shënoi golin që e kualifikoi Francën në Kampionatin Botëror 2010. “E kam thënë dhe do ta them sërish, e preka topin me dorë. Nuk jam një mashtrues dhe kurrë nuk kam qenë. Ishte një reagim instiktiv ndaj topit që vinte me shpejtësi të madhe brenda gjashtëmbëdhjetëmetërshit”. “Njerëzit përcjellin xhirimin e ngadalësuar të asaj që ndodhi, por jo të asaj që ndeshemi në fushë unë ose cilido futbollist tjetër. Nëse njerëzit e shikojnë në shpejtësi të plotë do ta vërejnë se ishte një reagim instiktiv”. “Natyrshëm, ndihem i turpëruar për mënyrën si fituam (biletën për në Kampionatin Botëror) dhe më vjen shumë keq për irlandezët, të cilët padyshim që meritojnë të jenë në Afrikën e Jugut”. “Kuptohet, zgjidhja më e drejtë do të ishte zhvillimi i sërishëm i ndeshjes, por kjo nuk është në duart e mia”, ka thënë Henry për Sky Sports News.

Diego: Kisha oferta nga Anglia, por zgjodha Juven

Mesfushori brazilian i Juventusit, Diego, ka zbuluar se ai ka pasur oferta për të kaluar edhe në Ligën Premier, por ka zgjedhur Juventusin pasi ka qenë fans i këtij klubi nga fëmijëria.
“Nëse Liga Premier më josh? Jo, vërtet nuk më josh. Të luaj në Juventus ka qenë një ëndërr e imja e fëmijërisë. Jam fans i biankonerëve që si djalosh i ri, para se të filloj karrierën time profesionale”, ka thënë Diego.“Juve dhe unë kemi një histori të gjatë të dashurisë. Kishim edhe më herë disa bisedime, por nuk kishte asgjë konkrete deri në verën e kaluar”, ka shtuar braziliani.Klubi nga Torino për shërbimet e Diegos ka harxhuar 25 milionë euro.

Tre ekipe italiane kërkojnë Drenthen

Sipas mediave italiane, Juventusi, Milani dhe Fiorentina, janë të interesuar të transferojnë Royston Drenthe nga Real Madrid.
22-vjeçari holandez ka një të ardhme të pasigurt në Santiago Bernabeu dhe është e mundur që ai të largohet nga klubi në muajin janar.Mediat në Itali spekulojnë se Juve dhe Milan seriozisht janë duke menduar të bëjnë ofertë për mbrojtësin e majtë, i cili po ashtu mund të luajë edhe si anësor i majtë.Për shërbimet e Drenthe verën e kaluar ishte e interesuar edhe Fiorentina. Viola dëshiron ta angazhojë lojtarin në formë huazimi me mundësi të transferimit të tij të përhershëm në fund të sezonit për një shumë prej 9 deri në 10 milionë euro.Drenthe kaloi në Bernabeu në vitin 2007, por vazhdimisht po përballet me vështirësi të formës dhe nuk mund të sigurojë vend në ekipin e parë të trajnerit Manuel Pellegrini.

Shqipëria bie një pozitë, Spanja rikthehet në maje

Kampioni evropian, Spanja, është rikthyer në maje të renditjes së FIFA-s për kombëtaret më të mira në botë.
Herën e fundit kreu pushtohej nga Brazili, që ishte në këtë pozitë që nga qershori, pasi triumfoi në Kupën e Konfederatave. Por Spanja është rikthyer në maje pas rezultateve të mira në ndeshjet e vlefshme për kualifikim në Botërorin 2010.Portugalia dhe Franca po ashtu kanë përfituar nga rezultatet e fundit dhe kanë pësuar ngritje në tabelë, me portugezët që renditen të pestët dhe francezët të shtatit.Argjentina dhe Anglia kanë pësuar rënie për nga dy pozita, e para tash është në vendin e tetë ndërsa e dyta një pozitë më poshtë. Holanda dhe Italia qëndrojnë në pozitat e tyre të muajit të kaluar, në pozitën e tretë, respektivisht të katërt.Kombëtarja shqiptare ka pësuar rënie për një pozitë dhe tash renditet e 98-ta në botë.

Eto'o: Nuk do të festoj nëse shënoj në Camp Nou

Sulmuesi kamerunas Samuel Eto’o thotë se ai nuk do të festojë nëse eventualisht shënon në Camp Nou të martën takohen kur Interi dhe Barcelona.
Eto’o gjatë verës së kaluar ishte pjesë e transferimit nga Barcelona në Inter, që lejoi në drejtim të kundërt të lëvizë Zlatan Ibrahimovic.“Më mungon Camp Nou. Atje kam kaluar shumë më shumë kujtime të mira se të këqija. Shpresoj se do të rikthehem me gëzim, pasi kur shkova në Inter nuk besoja se ndonjëherë do të luaj në Camp Nou”, ka thënë Eto’o.“Kurrë nuk do të festoj gol në Camp Nou. Puna ime është të shënoj gola, por nuk do t’i festoj ato në këtë stadium”, ka shtuar sulmuesi.

Franca kualifikohet pas vazhdimeve

Franca ka arritur të sigurojë një vend në Kampionatin e ardhshëm Botëror duke barazuar përballë Irlandës në Stade de France të Parisit me rezultat 1-1.
Në ndeshjen e parë, Les Bleus fituan me rezultat minimal si mysafirë të Irlandës në Croke Park, dhe dukej se do ta kishin shumë lehtë në ndeshjen e kthimit pasi luanin si vendas. Mirëpo nuk ndodhi ashtu. Mysafirët krijuan avantazh në minutën e 33-të me anë të Robbie Keane dhe e mbajtën këtë epërsi deri në fund të kohës së rregullt, prandaj u deshën vazhdimet për t’u caktuar se kusht do të shkonte në Botëror. Në vazhdime, Franca u tregua më efikase duke shënuar me anë të William Gallas (103’), i cili pranoi një top nga 'dora' e Thierry Henry për ta barazuar rezultatin.
Ky gol ishte i mjaftueshëm që Franca të kualifikohej në Kampionatin Botëror 2010 që zhvillohen verën që vjen në Afrikën e Jugut.

Sllovenia lë Rusinë në shtëpi

Përfaqësuesja e Sllovenisë ka siguruar kualifikimin për në Kampionatin Botëror 2010, falë golit të shënuar në terren mysafir në ndeshjen e parë të barashit kundër Rusisë.
Në përballjen e parë, të zhvilluar në Luzhniki Stadium të Moskës, Rusia fitoi me rezultat prej 2-1, ndërsa në ndeshjen kthyese, sllovenët shënuan fitore prej 1-0 për të qenë pjesë e skuadrave pjesëmarrëse në Kampionatin e ardhshëm Botëror. Njeriu që dërgoi Slloveninë në Afrikën e Jugut ishte Zlatko Dedic, i cili shënoi golin vendimtar në minutën e 44. Duhet përmendur se nga minuta e 67-të, rusët luajtën me një lojtar më pak në fushë, pas përjashtimit të Aleksandr Kerzhakov me karton të kuq. Ndërsa në fund të ndeshjes (90’) edhe Yuri Zhirkov u përjashtua nga ndeshja.

Portugalia eliminon Bosnjën

Në të dyja ndeshjet e barashit për një vend në Kampionatin Botëror, Portugalia ka shënuar fitore minimale përballë Bosnje-Hercegovinës, për të siguruar një vend në Afrikën e Jugut.
Me rezultat prej 1-0, portugezët fituan në ndeshjen e zhvilluar të shtunën në Estadio da Luz të Lisbonës, ndërsa me të njëjtin rezultat mposhtën boshnjakët edhe në ndeshjen e zhvilluar të mërkurën mbrëma në Bilino Polje të Zenices. Golin e vetëm për Portugalinë sonte e shënoi Raul Meireles (56’), i cili shfrytëzoi një pasim të Nanit. Pas golit të pësuar boshnjakët duhej të shënonin tri herë për t’u kualifikuar, ndërsa deri në fund të ndeshjes ata nuk arritën të ndryshonin asgjë. Dhe kështu, Portugalia do të jetë në Kampionatin Botëror 2010.

Greqia në Botëror

Përfaqësuesja e Greqisë ka shënuar fitore si mysafir i Ukrainës për të siguruar vizën për në Kampionatin Botëror 2010.
Pas barazimit pa gola në ndeshjen e parë në Athinë, helenët e mposhtën Ukrainën në Donbass Arena në Donetsk me rezultat minimal për të zënë një vend në Afrikën e Jugut. Heroi i grekëve këtë mbrëmje ishte Dimitris Salpingidis, i cili në minutën e 31-të shënoi golin e vetëm në ndeshje që ishte edhe goli kualifikues. Është kjo hera e parë që nga viti 1994 që grekët janë pjesë e një Kampionati Botëror.

Raikkonen tërhiqet nga Formula 1

Ish-kampioni i botës në Formula 1, Kimi Raikkonen, sezonin e ardhshëm nuk do të jetë pjesë e garës më prestigjioze automobilistike, pasi që nuk ka mundur të gjejë një skuderi të përshtatshme.
Agjenti i finlandezit, David Robertson, ka thënë për BBC Sport se klienti i tij ishte munduar të arrinte një marrëveshje me McLarenin, mirëpo drejtuesit e kësaj skuderie nuk ishin pajtuar ta paguanin aq sa kishte kërkuar 30-vjeçari. Robertson ka thënë se aktualisht klienti i tij është duke kërkuar të jetë pjesë e Kampionatit Botëror në ‘rally’, edhe pse ende nuk është arritur ndonjë marrëveshje. Agjenti i Raikkonen, ka thënë se piloti megjithatë do të kthehet në Formula 1 në vitin 2011, për të tentuar ta fitojë Kampionatin Botëror.

Button pilot i McLarenit

Kampioni i botës në Formula 1, Jenson Button, nga sezoni i ardhshëm do të vozisë krahas Lewis Hamiltonit, pasi që ka nënshkruar për McLarenin.
Njoftimi për këtë transferimi është bërë të mërkurën, me ç’rast McLareni do të ketë pilotët më të mirë në dispozicion. “Edhe pse e fitova Kampionatin Botëror me Brawn GP sezonin që shkoi- dhe nuk do ta harroj kurrë këtë- isha i vendosur që ta vendosja veten para sfidave të freskëta”. “Lewis është një pilot i talentuar, i cili ka siguruar respektin e të gjithë pilotëve të Formula 1, dhe jam sigurt se ka shumë gjëra që mund të mësojmë nga njëri-tjetri”, ka thënë Button.

Ronaldo nga minuta e parë kundër Barcës

Pas mungesës në dhjetë ndeshje të Real Madridit, pritet që Cristiano Ronaldo të filloje nga minuta e parë në ndeshjen kundër Barcelonës në Camp Nou.
Më 29 nëntor dy gjigantët spanjollë do të takohen në kështjellën e Barcës për të zhvilluar derbin ‘el Clasico’, ndërsa Marca njofton se superylli portugez do të jetë në fushë nga fillimi i ndeshjes. Mjekët e Ronaldos thonë se trajtimi i nyjës po përparon me sukses, ashtu që anësori portugez pritet të luajë që në ndeshjen kundër Cyrihut në Ligën e Kampionëve.