Moggi: Barcelona do ta fitojë LK, jo Interi

Njeriu më kontrovers në futbollin italian, Luciano Moggi, ka mohuar se Interi është favorit për të fituar Ligën e Kampionëve duke thënë se Barcelona do ta rifitojë titullin e më të mirit të Evropës.
“Interi as këtë vit nuk do ta fitojë Ligën e Kampionëve. Mendoj se Barcelona do të rikonfirmohet si kampion. Liga e Kampionëve po tërheq shumë energji fizike dhe mentale nga Interi”, ka thënë ish-drejtori i Juventusit.
Moggi foli edhe për kaosin tek ish-skuadra e tij Juventus, duke thënë se Bianconerëve u duhen ndryshime radikale duke filluar nga koka e klubit.
“Jam i bindur se Juventusi do të përfundojë në pozitën e katërt, por e ardhmja duket jo e mirë për arsye se ekipi duhet të rindërtohet”, tha Moggi.

Category: Futboll