Trazirat rrezikojnë fillimin e Ligës Premier

Trazirat të cilat shkaktuan anulimin e miqësores në mes të Anglisë dhe Holandës, e kanë vënë në dyshim edhe fillimin e ndeshjeve të Ligës Premier këtë vikend.
Shpërthimi i dhunës ka tejkaluar limitet e policisë dhe mund të kërcënojë zhvillimin e ndeshjeve të elitës së futbollit anglez, që zakonisht monitorohen nga 100 policë.

Nëse forcat policore vendosin se ata nevojiten diku tjetër, atëherë kjo mund të bëjë që ndeshjet e Ligës Premier të shtyhen.

Ndeshja e sotme miqësore në mes të Anglisë dhe Holandës e paraparë të zhvillohet në Wembley është shtyrë, siç janë shtyrë edhe katër ndeshje të Kupës Carling në Londër si edhe miqësorja në mes të Ganës dhe Nigerisë në Watford gjatë të martës.

“Me informatat të cilat i kemi tash, nuk ka arsye për të menduar se ndonjë ndeshje jashtë Londrës mund të preket”, thuhej në një deklaratë të djeshme të Ligës Premier dhe Ligës së Futbollit.

Megjithatë shpërthimi i dhunës në Manchester, West Midlands, Nottingham dhe Gloucester mund të detyrojë drejtuesit e këtij sporti të rimendohen.

Fjalën e fundit për zhvillimin ose jo të ndeshjeve në Londër do t’i thotë Policia e Kryeqytetit, pasi të monitorojnë situatën gjatë 48 orëve të ardhshme.

Category: Futboll