Rijkaard: Holanda mund të fitojë në Euro 2012

Trajneri i Arabisë Saudite, Frank Rijkaard, thotë se Holanda ka kualitete t’ia dalë në kampionatin e ardhshëm Evropian që zhvillohet në Poloni dhe Ukrainë.
Rijkaard, i cili ishte pjesë e ekipit holandez që fitoi Euro 1988, beson se ekipi aktual holandez ka të gjitha elementet për të mposhtur çdo rival dhe për ta fituar garën e kësaj vere.

“A mund ta përsërisë ky ekip suksesin e vitit 1988? Të jem i sinqertë, po. Është e lehtë të thuash se mund ta bëjnë, sigurisht, por mendoj se ata vërtet munden. Gjithçka duhet të jetë në vend që kjo të ndodhë dhe ju keni nevojë për ca fat, por nëse ata mund ta ruajnë atë shpirt të madh ekipor atëherë përfundimisht është e mundshme”.

“Holanda mund të mposhtë çdo ekip në botë në ditën e tyre. Arsyeja kryesore për suksesin e tyre është talenti i dukshëm i gjeneratës së re të lojtarëve, shpirti i tyre ekipor, dhe dëshira për t’u futur në analet e futbollit holandez duke fituar një trofe të madh”, ka thënë Rijkaard.

Category: Futboll