Super Ronaldo i sjell fitoren Realit (VIDEO)

Real Madridi ka triumfuar me rezultat 4-1 përballë Atletico Madridit në derbin e kryeqytetit spanjoll që u zhvillua të mërkurën mbrëma në Vicente Calderon.
Të dyja skuadrat luajtën mirë në gjysmën e parë të takimit, gjatë të cilës i ndau vetëm një gol.Me një supergjuajtje të lirë nga një distancë prej rreth 32 metrash, Cristiano Ronaldo heshti tifozët vendas (25’).

Në gjysmën e dytë, vendasit arritën ta barazojnë rezultatin kur pas një krosimi të Adrian, Radamel Falcao hyri mes Coentraos dhe Ramosit për të shënuar golin që rezultoi i nderit për vendasit (55’). Në vazhdim, Mbretërit ishin dominues në ndeshje, por nuk gjenin hapësira për të shënuar. Megjithatë, për Realin luan lojtari i quajtur Cristiano Ronaldo, i cili me një gol edhe më të bukur se i pari, riktheu avantazhin e Los Blancos (68’).

Gonzalo Higuain u ndal në mënyrë të palejuar brenda gjashtëmbëdhjetëmetërshit dhe arbitri akordoi penalti duke i mundësuar Ronaldos të realizonte het-trik dhe të shënonte golin e 40-të në La Liga këtë edicion (83’).Portugezi pati një rast të mirë ta shënonte edhe golin e katërt personal, mirëpo këtë ia mohoi portieri vendas. Por, menjëherë pas ai arriti të asistojë te Callejon, i cili vendosi rezultatin përfundimtar të ndeshjes (88’).

Real Madridi kryeson Kampionatin spanjoll me katër pikë më shumë se Barcelona.

Category: Futboll