Mourinho: Te Reali erdha për ta sfiduar Barcën

Ish-trajneri legjendar i Interit, Jose Mourinho, ka zbuluar se mundësia për ta sfiduar në mënyrë të drejtpërdrejt Barcelonën ishte një prej arsyeve të tij kryesore pse ai iu bashkua klubit mbretëror në vitin 2010.

Mourinho arriti të rrëzojë Barcelonën në vitin 2010 kur me Interin e tij legjendar arriti të mposhtë Barcelonën e frikshme të Guardiolës. Duke parë mundësinë që të luajë pesë herë në vit me ekipin që ai e urren më së shumti, Mourinho kaloi menjëherë pas triumfit të tripletës te klubi spanjoll.

“Po flasim për Barcelonën dhe Real Madridin, dy klube të mëdha. Cilindo klub në botë merreni dhe inkuadrojeni në La Liga, ju garantoj se nuk do të jetë në top dyshe. Dhe kjo është arsyeja pse iu bashkova Real Madridit. Sepse nuk është e lehtë ta sfidosh Barcelonën. Është shumë e vështirë të jesh i suksesshëm në këtë kampionat”.

“Është më lehtë në kampionate tjera. Cilido kampionat ku nuk ke punë me Barcelonën është më i lehtë. Barcelona është arsyeja kryesore pse shkova te Real Madridi, sepse ai ekip më bën të jem në nivelin më të lartë. Epoka e suksesit e Barcelonës ka mbaruar, por cikli i tyre ende nuk ka mbaruar. Ata janë ekip i mrekullueshëm dhe kështu jemi edhe ne”.

“Rivaliteti mes Realit dhe Barcelonës është bekim për futbollin. Unë nuk kam statistika, por jam i sigurt se Superkupa e Spanjës ka pasur shikueshmëri më të madhe se sa shumë ndeshje të Ligës së Kampionëve sezonin e kaluar”, ka deklaruar Mourinho për AS.

Category: Futboll