Reali, vështirë ta zë edhe vendin e dytë

Real Madridi ka luajtur pa gola kundër Osasunas në takimin e të shtunës mbrëma që u zhvillua në Estadio El Sadar.

Në fraksionin e parë të lojës, ekipi vendas arriti që të mbrohej mirë duke anashkaluar rrezikun e ofensivës mysafire, e cila ishte e zbehtë pa të suspenduarin Cristiano Ronaldo.

Portieri vendas Fernandez bëri një dalje të gabuar në këtë pjesë, megjithatë Los Blancos nuk arritën ta shfrytëzojnë këtë moment.

Në gjysmën e dytë, veçojmë disa raste Osasunas që ka mundur të kalojë në avantazh, si edhe një kërkim-penaltie të Solas kah fundi i ndeshjes që në fakt nuk pati kontakt.

Madrilenët, nga ana tjetër, në këtë pjesë mbetën pa Ricardo Kakan, i cili u përjashtua me kartonin e dytë të verdhë (76’).

Po ashtu, Callejon arriti ta dërgojë topin në rrjet, por goli u anulua për pozitë të parregullt.

Real Madridi është katër pikë prapa pozitës së dytë të cilën e mban Atletico Madridi, që me fitore eventuale ndaj Zaragozas do të distancohet shtatë pikë nga Mbretërit.