Ronaldo i jep lamtumirë emocionale Brazilit

Ronaldo u ka dhënë përshëndetjen e fundit fansave të kombëtares braziliane gjatë një takimi të mbrëmshëm emocional kundër Rumanisë.
Ish-ylli i Barcelonës, Real Madridit, Interit dhe Milanit, u inkuadrua në ndeshje në minutën e 30-të të takimit për të luajtur 15 minuta, derisa Brazili shënoi një fitore minimale 1-0.
Megjithatë, pavarësisht tre shanseve 34-vjeçari nuk ishte në gjendje të realizojë ambicien e tij të fundit në fushë. Në pauzën mes pjesëve gjatë prononcimit emocional Ronaldo ka shprehur zhgënjimin që nuk mundi të gjejë golin.“Ma falni, kisha tre shanse por nuk munda të shënoj një gol në 15 minutat e mia të fundit, të cilat do të kishin qenë një shpërblim për gjithçka që ju keni bërë për mua. Falënderime të mëdha për gjithçka që keni bërë për karrierën time, që më keni pranuar ashtu siç jam, që keni qarë kur kam qarë edhe unë, që keni qeshur kur kam qeshur edhe unë. Thjesht duhet t’ju falënderoj nga thellësia e zemrës”, ka thënë Ronaldo.

Category: Futboll