Kontrata për Guardiolan është e gatshme

Presidenti i Barcelonës, Sandro Rosell, ka deklaruar se klubi e ka të gatshme kontratën e re për trajnerin Pep Guardiola.
Guardiola mori drejtimin e Blaugranëve në vitin 2008, ndërsa është bërë trajneri më i suksesshëm në historinë e Barcelonës, duke rrëmbyer 12 trofe deri më tani me rreth 200 ndeshje të zhvilluara.

Megjithatë, 40-vjeçari gjithmonë ka refuzuar që të lidhet për këtë klub për një kohë më të gjatë. Sidoqoftë, duket se drejtuesit e klubit tashmë i kanë përgatitur ofertë të re dhe presin nënshkrimin e tij.

“Ne po bëjmë gjithçka që është e mundur që Guardiola të vazhdojë. Për të dera e zyrës sonë është gjithmonë e hapur dhe kontrata është e gati”.

“Ai mund të zgjedhë të nënshkruajë për një vit, dy, tre ose katër, ose nëse dëshiron, ai mund të nënshkruajë për një vit me opsionin për një tjetër, ose me opsionin për dy vite tjera”.

“Kontrata është në tavolinë për të që të ndjehet i lumtur dhe komod. Shpresojmë se do të thotë ‘po’ dhe do të qëndrojë me ne”, ka thënë Rosell për Al Jazeera.

Category: Futboll