Tifozët kërcënojnë gruan e Rooneyt

Coleen Rooney, gruaja e sulmuesit të Manchester Unitedit, Wayne Rooney, është kërcënuar me vdekje, pasi në Twitter ia ka uruar Liverpoolit fitoren kundër Cardiffit në finale të League Cup.

Redsat e fituan trofeun pas ekzekutimit të penaltive, ndërsa Coleen ka shkruar në profilin e saj: “Urime Liverpoolit”. Ky veprim i ka hidhëruar tifozët e United, duke qenë se gruaja e sulmuesit të tyre bën tifo për “armikun e përbetuar”.

“Deri më tash më ke pëlqyer, ndërsa tash dua që edhe ti edhe familja jote të digjeni”, ka shkruar një tifoz.

Coleen u ka treguar 610.000 ‘ndjekësve’ të saj në rrjetin social Twitter se ajo është tifoze e Liverpoolit, përkundër se Rooney ka luajtur për rivalin lokal Everton dhe tash luan për rivalin tjetër, Manchester United.

Ndërkohë, zëdhënësi i Wayne Rooneyt nuk ka komentuar asgjë.

Category: Futboll