Ribery dënohet, grushtoi Robbenin

Mesfushori i Bayernit të Munichut, Franck Ribery, është dënuar me 50 mijë euro nga klubi gjerman pasi grushtoi bashkëlojtarin e tij Arjen Robben në zhveshtore gjatë pushimit të pjesës së parë në fitoren prej 2-1 ndaj Real Madridit të martën.
Francezi u nervozua pse bashkëlojtari i tij holandez nuk e lejoi ta godasë gjuajtjen e lirë në minutën e 40-të, ndërsa shenja në fytyrë nga ‘boksi’ i Riberys ishte evidente në fytyrën e Robben, e që pasoi me dënim për francezin.

Përkundër faktit se Jupp Heynckes e mohoi incidentin, Bild shkruan se Ribery tashmë është dënuar nga klubi i tij.

Bayerni do të përballet me Werderin para se të ndeshet me Realin në gjysmëfinalen kthyese të Ligës së Kampionëve në Bernabeu.

Category: Futboll