Lakers në avantazh 3-1 ndaj Nuggets
Ramon Sessions dhe Steve Blake kanë shënuar trepikësha në minutën e fundit të takimit për t’i dhënë Los Angeles Lakers fitoren 92-88 në udhëtim te Denver Nuggets si dhe avantazhin 3-1 në rundin e parë të serisë së playoffit.
Nuggets vendosën presion në Lakers duke barazuar 86-86 me 48 sekonda të mbetura para se Sessions t’ia japë avantazhin skuadrës mysafire dhe më pas rezerva Blake të jetë i saktë në tentimin e tij për trepikësh që vulosi fituesin.
Kobe Bryant shënoi 22 pikë dhe kontribuoi me tetë kërcime dhe gjashtë asistime për Lakers, të cilët mund të kualifikohen në rundin e ardhshëm nëse fitojnë në ndeshjen e pestë që zhvillet të martën në Los Angles. Fituesi do të takohet me tashmë të kualifikuarin në rundin e ardhshëm, Oklahoma City Thunder.
Në Konferencën Lindore, Boston Celtics dhe Philadelphia 76ers po ashtu kanë marrë avantazhin 3-1 në serinë e playoffit, duke mposhtur Atlanta Hawks respektivisht Chicago Bulls.
New York Knicks i ka shpëtuar eliminimit, së paku për një kohë, duke ngushtuar në 3-1 disavantazhin në sfidën përballë Miami Heat.
Category: Basketboll
0 Komente