Massa: Mosha fajtore për mossuksesin e Schumit

Piloti i Ferrarit, Felipe Massa, ka komentuar rezultatet e dobëta të shtatëherë kampionit botëror në Formula 1, Michael Schumacher.
43-vjeçari, i cili vozit bolidin e Mercedesit, është tërhequr pesë herë në shtatë garat e këtij viti, ndërsa ato dy që i përfundoi zuri vetëm vendet e dhjeta.

“Nuk e di, ndoshta ka të bëjë me vitet e tij”, ka thënë Massa për Sport 360.

Në vitin 2006, Schumi u pensionua nga Formula 1, mirëpo u kthye pas tre vitesh, megjithatë asnjëherë nuk e ktheu formën e tij të dikurshme në pistë.

“Formula 1 ka ndryshuar shumë që kur Michael u largua. Unë kam qenë vazhdimisht brenda dhe e kam shumë të vështirë të përballem me ndryshimet, prandaj mund ta imagjinoj si e ka ai. Më e rëndësishmja është që njeriu të argëtohet, ndërsa Michael e bën pikërisht këtë”, ka deklaruar braziliani.

Category: Formula 1