Abramovich e dëshiron Van Bastenin

Marco van Basten është duke u menduar si zëvendësim për Carlo Ancelottin te stoli drejtues i Chelseat, shkruajnë mediat angleze.
Mail on Sunday ka bërë të ditur se pronari i Chelseat, Roman Abramovich, është duke vazhduar rigjenerimin e klubit, dhe legjenda holandeze Van Basten është duke u menduar si zëvendësim potencial nëse Ancelotti largohet në fund të sezonit.
Van Basten është kandidati kryesor për të marrë nën drejtim Chelsean nëse forma e dobët e Bluve vazhdon edhe më tej. Ata udhëtojnë sot te Fulham, duke kërkuar fitoren për të mbetur në pozitën e katërt që dërgon në Ligën e Kampionëve.
Van Basten është një prej sulmuesve më të mëdhenj që Holanda ka pasur ndonjëherë, ndërsa gjatë karrierës së tij menaxheriale ai drejtoi kombëtaren e tij në Kupën Botërore 2006 dhe Euro 2008, para se më pas të vijë në krye të Ajaxit ku qëndroi për më pak se një sezon.

Category: Futboll