Shtyhet edhe fillimi i Serie A?

Kërcënimi për grevë të lojtarëve në fillim të sezonit të Serie A është rritur pasi Liga Italiane e Futbollit ka refuzuar të nënshkruajë marrëveshjen e re kolektive, shkruajnë mediat italiane.
Asociacioni i Lojtarëve Italianë (AIC) këtë javë tha se do të futet në grevë para ndeshjeve të para të sezonit të ri të Serie A që planifikohen të zhvillohen gjatë këtij vikendi, nëse nuk arrihet marrëveshje e re.

Megjithatë, presidenti i Ligës, Maurizio Beretta, tha të mërkurën: “Asambleja gjenerale e Ligës ka refuzuar marrëveshje me lojtarët me shumicë votash, 18 përkundër dy”.

Mospajtimet kanë të bëjnë pjesërisht me klubet të cilat përpiqen t’i detyrojnë lojtarët të largohen në vitin e fundit të kontratave të tyre dhe me lojtarët e padëshiruar që detyrohen të stërviten ndaras.

Ndërkohë, Liga kërkon të përfshijë në marrëveshje edhe një klauzolë për të konfirmuar se lojtarët do të paguajnë një taksë të re të vendosur nga qeveria italiane këtë muaj për të gjithë ata të cilët fitojnë mbi 90 mijë euro në muaj.

Category: Futboll