Fitore dramatike e Interit

Interi ka arritur të shënojë fitore të madhe ndaj Genoas me rezultat 5-4, duke realizuar kështu një debutim shumë të suksesshëm të trajnerit të ri, Andrea Stramaccionit.
Interi në këtë sfidë u paraqit më ndryshe. Me një formacion 4-3-3 dhe me motivim të shtuar, tifozët në shkallët e stadiumit kanë pasur se çfarë të shikojnë.

Diego Milito hapi serinë e golave pas 13 minutash lojë, kur pas një harkimi të Diego Forlan realizoi me kokë për 1-0. Seria e golave vazhdoi dhe ishte El Principe ai që përsëri realizoi, tani për 2-0 (27').

Fitoren e Interit në këtë takim në njëfarë mënyre e garantoi Walter Samuel, kur shënoi për 3-0 (38'). Shpresat e gjenovianëve i mbajti Emiliano Moretti, i cili shënoi për 3-1 dhe rezultatin e pjesës së parë.

Në pjesën e dytë Interi ishte edhe më impenjativ dhe kjo ka mundur t'u hakmirret Nerazzurëve të cilët bënë tri penalti në dëm të tyre, e që të triat i realizuan mysafirët.

Fillimisht Rodrigo Palacio (59') shënoi për 3-2, duke vënë në dyshim epokën e re të Stramaccionit. Sidoqoftë, në vazhdim Mauro Zarate iu kthehet golave duke shënuar për 4-2 (74'). Pesë minuta më vonë Julio Cesar përjashtohet nga loja dhe përsëri u akordua penalti në dëm të Interit, të cilën e konkretizoi për 4-3 Alberto Gilardino (80').

Edhe Interi fiton një penalti pas pesë minutave, të cilën pas kartonit të kuq të Belluschit e realizoi Diego Milito, që shënoi për hettrikun e tij (85') dhe rezultatin 5-3. Në fund, Lucio e shtoi dramën në Meazza, duke ua dhuruar mysafirëve penaltinë e tretë në takim të cilën e konkretizoi Alberto Gilardino (90') për rezultatin përfundimtar 5-4.

Me këtë fitore Interi gjendet në vendin e shtatë me 44 pikë, shtatë pikë larg vendit të tretë që dërgon në Ligën e Kampionëve dhe tetë javë pa përfunduar sezoni në Serie A.

Category: Futboll