Shaqiri: Dëshiroj të mësoj nga Guardiola

Ylli kosovar, Xherdan Shaqiri, pritet të gëzojë një të ardhshme të ndritshme te Bayern Munichu. Kjo edhe pas lajmit bombastik të kësaj jave, emërimin e Pep Guardiolës në krye të bavarezëve për stinorin e ri.

Xherdani do ta ketë rastin të stërvitet nën urdhrat e trajnerit që për disa vite udhëhoqi triumfet e njëpasnjëshme të Barcelonës bashkë me yje si Messi, Iniesta e Xavi. Një gjë të tillë e di edhe Xherdani. Ky i fundit, duke folur për mediat gjermane, ka thënë se do të mësojë shumë nga Guardiola, ndërsa njëkohësisht do ta jap maksimumin për të zënë një vend në 11-shen e parë të bavarezëve.

“Karriera e tij e suksesshme me Barcelonën është fantastike. Unë sigurisht se do ta jap maksimumin që të merrem në konsideratë dhe të luaj një rol të rëndësishëm në skuadër”, deklaroi Shaqiri. Ky i fundit pati një gjysmëstinor mjaft të mirë me Bayernin, duke befasuar të gjithë me paraqitjet e tij dhe duke shënuar gola në të gjitha garat që bavarezët kanë luajtur deri tani.

“Unë arrita ta tregoja vetën. Doja t’i tregoja trajnerit se nuk jam një lojtar që mund të luaj pak, por t’i tregoja se mund të vendosi ndeshje”, u shpreh Shaqiri për performancat e tij të deritashme. Ai u transferua te Bayerni gjatë afatit kalimtar veror të vitit të kaluar nga Baseli. (ORAinfo)