Zyrtare: Cassano i Interit, Pazzini i Milanit

Milani ka konfirmuar në faqen zyrtare të klubit se ka kompletuar nënshkrimin me Giampaolo Pazzinin nga Interi, derisa Antonio Cassano ka lëvizur në kahe të kundërt.

Rossonerët raportohet se i kanë paguar rivalit të qytetit një shumë shtesë prej 7 milionë euro për ta kompletuar lëvizjen.

Të dyja klubet kishin arritur marrëveshje që hënën mbrëma, me dy lojtarët që dje iu nënshtruan testeve mjekësore te klubet e reja, dhe marrëveshja sot bëhet zyrtare.

Milani ishte në kërkim të një sulmuesi të ri pas largimit të Zlatan Ibrahimovic te Paris Saint-Germain, dhe Massimiliano Allegri tash e ka gjetur të preferuarin e tij te Pazzini.

Sulmuesi 28-vjeçar nuk ishte më i nevojshëm te Interi, pasi Andrea Stramaccioni mendoi se ai nuk i përshtatet sistemit të tij dhe Pazzini tash do ta vazhdojë karrierën te Rossonerët.

Cassano, ndërkohë, kishte bërë kërkesë transferimi pasi mendon se Milani nuk ka ambicie për tituj pasi lejoi largimin e disa lojtarëve kyç gjatë verës, dhe ka shfrytëzuar rastin t’i bashkohet klubit të cilin e kishte mbështetur si fëmijë. Italiani me Interin ka nënshkruar kontratë deri në verë të vitit 2014.

Category: Futboll