Cana: E merituam fitoren

Kapiteni kuqezi ka thënë pas ndeshjes se lojtarët janë stimuluar kur kanë parë mbështetjen e tifozëve edhe pas motit të ligë dhe asaj çfarë ndodhi të premten.

“Zhvilluam një ndeshje të bukur, duke dhënë maksimumin. E kemi merituar fitoren, ashtu siç e meritonim edhe të premten (kundër Islandës), por dihet që në futboll nuk është e thënë që fiton ai që luan më mirë. Skuadra ka meritë që ngriti kokën dhe vazhdoi përpara, duke dhënë gjithçka që kishte në fushë”.

“Sllovenia është skuadër më e mirë se Islanda, por ne ia dolëm, sepse në momentin që dolëm në fushë pamë mbështetjen e njerëzve, katër ditë pas asaj disfate që na dhembi të gjithëve”.

“Tifozët ishin të pranishëm dhe na ndihmuan. Donim t’u dhuronim atyre këtë fitore, këtu në stadiumin tonë që nuk është i mbuluar, njerëzit u lagën, por me zemër e mbështetën kombëtaren dhe ne ua shpërblyem”, ka thënë Cana.