Guraziu në formë, Hajvalia fiton

Sa herë që sulmuesi më efikas në Superligë, Fillim Guraziu, është në formë, as Hajvalia nuk ka se për çfarë të brengoset. Guraziu me dy gola e ka ndihmuar Hajvalinë të shënojë fitore kundër Hysit me rezultat 2:0. Guraziu e ka shtuar në 13 numrin e golave këtë sezon. Ndeshja nën mbizotërimin e vendasve, derisa mysafirët kishin udhëtuar pa futbollistët kryesorë, kapitenin Mentor Zhdrella e Labinot Osmani. Qysh në minutën e 11-të të ndeshjes, Guraziu tregoi se është në formë kur pasi që mori një top nga Kastrati dhe nga vija e 16-metërshit e la të shtangur portierin Blakqori (1:0).

Pas këtij goli vendasit u hodhën tërësisht në sulm duke provuar që sa më shpejt të shënojnë edhe golin e dytë dhe të rehatisë të cilën e arritën në minutën 41’. Ahmeti me një top të gjatë gjen Zenelin i cili me kokë asiston deri të Guraziu e ky me një pasim të dyfishtë me Kastratin del përballë me Blakqorin dhe me goditje me volej nuk dështon (2:0). “Mendoj që e merituam fitoren edhe pse rezultati ka mundur të jetë edhe më i lartë. Kjo është fitore e rëndësishme për ne dhe shpresoj të vazhdojmë kështu edhe në ndeshjet tjera”, tha trajneri i Hajvalisë, Emin Bajrami.

Hysi tentoi dy herë përmes goditjeve të dënimit nga Qitaku dhe Hajdini të ndryshojë ndonjë gjë mirëpo nuk ia doli. “Na munguan gjashtë futbollistë në këtë takim dhe djelmoshat e rinj bënë aq sa mundën. Mendoj se Hajvalia luajti më mirë dhe me meritë fitoi”, tha trajneri Hysni Maxhuni.

Hajvalia – Hysi 2:0

Stadiumi: “Xhemajl Ibishi” në Prishtinë, Shikues: 100, Arbitra: Shala, Batalli, Rrahimi, Rraci, Shënues: Fillim Guraziu 11’ 26’, Kartonë të Verdhë: F.Guraziu (Hajvali), F.Ademaj, B.Idrizi (Hysi)

Hajvalia: Avdyli, Ahmeti, Gashi (C), Jashari, Krasniqi, Vokshi, Statovci, Kastrati (Zuqaku), Berisha (Zogiani), Makolli (Zeneli), Guraziu.

Trajneri: Emin Bajrami

Hysi: Blakqori, Ademaj, Kadriu, Idrizi, Jashanica (Hasani), Qitaku, Neziri (Zeneli), Zeqiri, Hajdini, Hajdari (C), Islami.

Trajner: Hysni Maxhuni