Trepça e sigurt

Trepça ka shënuar edhe një fitore, e cila ia siguron asaj vendin në krye të tabelës. Kësaj radhe xehetarët mposhtën Lirinë me rezultat 3:1, në kuadër të javës së 16-të të Superligës së Kosovës. Të dy ekipet treguan lojë cilësore dhe të hapur, por nga e cila përfitoi ekipi mitrovicas. Ky ballafaqim u karakterizua edhe me shumë kartonë, tetë të verdhë dhe një të kuq. Një tollovi në mbrojtjen e Lirisë, më së mirë e shfrytëzoi Zhjeçi, duke kaluar vendasit në epërsi (1:0).

Pasi golit, udhëtuesit sulmonin dhe në minutën 13’, Skeraj barazon shifrat (1:1). “Bëmë gabime në fillim të takimit dhe pësuam dy gola, ndërsa në pjesën e dytë e kontrolluam lojën dhe krijuam raste për të barazuar, por pranuam edhe golin e tretë. Gjendjen na e vështirësoi edhe përjashtimi i Brandos”, tha trajneri i Lirisë, Skender Kapra.

Tetë minuta më vonë, vendasit arrijnë sërish epërsinë. Kapiteni Babaj ishte i saktë nga një gjuajtje dënimi (2:1). Vendasit e nisen vrullshëm pjesëlojën e dytë dhe si rezultat erdhi goli i tretë dhe verifikues për fitoren e tyre. Në minutën 90’ Shkupolli harkoi e topi erdhi deri të Zabërxha, i cili nga afërsia tund rrjetën e prizrenasve (3:1). “Ishte një lojë e vështirë. Në fillim shënuam dy gola për ta fituar qetësinë e vazhdimit, ndërsa krejt në fund shënuam edhe golin e tretë. Është fundi i stinorit dhe unë e kuptoj lodhjen e futbollistëve. Kjo fitore ishte e merituar dhe mjaft e vlefshme”, tha Fidaim Haxhiu, trajner i Trepçës. K.Gecaj

Trepça 3

Liria 1

Stadiumi “Adem Jashari” në Mitrovicë. Shikues: 200. Arbitra: Vula, Bajrami, Haziri, Musolli. Shënues: Zhjeçi 6’, Babaj 21’, Zabërxha 90’ – Skeraj 13’. Kartonë të verdhë: Ibrahimi, Hashani, Voca, Zabërxha,

Krasniqi, Shkupolli – Kryeziu, Islamaj. Kartonë i kuq: Brando

Trepça: Beqiri, Ibrahimi, Shabani (Krasniqi), Fetahi (Bytyqi), Hashani, Zhjeçi, Voca (Shkupolli), Balija, Zabërxha, Babaj, Sermaxhaj - Trajner: Fidaim Haxhiu

Liria: Thaçi, Mazreku, Karahoda, Loshaj, Brando, Kryeziu, Islamaj (Gashi), Muriqi, Skeraj, Krusha, Mehja (Rama) - Trajner: Skender Kapra