Futbollistët e Shkëndisë paguhen me paratë e publikut
Duke parë se për momentin ekipi ka mbetur në mëshirë të fatit dhe për këtë arsye kryesia e ngushtë ka marrë iniciativë për të tentuar ta përmirësojë situatën. Në fakt, është vendosur që paratë që do të mblidhen nga dy ndeshjet e radhës, të shtunën me Renovën dhe të mërkurën me Vardarin në kuadër të Kupës, t’u ndahen futbollistëve në emër të pagave mujore.
“Duke e parë situatën e vështirë financiare që mbizotëron në klub, e kemi parë të rrugës që paratë që do të grumbullohen nga dy ndeshjet e ardhshme, t’u shpërndahen futbollistëve. Ata tani më disa muaj nuk kanë pranuar pagat e tyre mujore dhe për momentin kjo duket mënyra e vetme për t’i ndihmuar. Për këtë arsye lusim edhe tifozerinë tetovare që të vijë në numër sa më të madh në këto dy përballje, pasi në këtë mënyrë kontributi i tyre do të jetë më i madh. Publiku tetovar ka dëshmuar historikisht se qëndron pranë ekipit në çastet më të vështira dhe presim që edhe tani të jenë në ndihmë të krenarisë së tyre, Shkëndijës”, thuhet në komunikatën e lëshuar nga kryesia e klubit tetovar, transmeton Alsat M.
Nga tabori i Shkëndijës shpresojnë që në këtë mënyrë ta zbusin krizën në ekip, deri në stabilizimin e situatës. /Fish Media/
Category: Futboll
