Futbollistët e Prishtinës sulmohen nga tifozët serbë
Sulmin e ka konfirmuar për ORAinfo lideri i tifozëve të Prishtinës, “Plisat”, Albert Kastrati – Tigri.
Ai ka thënë se futbollistët e sulmuar, të cilëve nuk ka dashur t’ua përmend emrin tash për tash, mbanin veshur fanella me logo të klubit. Derisa me këtë rast ka pësuar edhe gazetari i klubit, Avni Durmishi, i cili edhe është shtruar në spital.
“Sulmi është bërë nga 10 serbë, me gjasë tifozë të klubit zviceran Young Boys”, ka thënë Kastrati, i cili ka kërkuar që për këtë incident autoritetet e Kosovës dhe FFK-ja të kërkojnë sqarim nga zyrtarët e kryeqytetit zviceran.
Ndërkohë, kampioni i Kosovës në futboll, dje ka zhvilluar takimin miqësor në Zvicër, kundër skuadrës Koniz. ‘Djemtë’ e kryetrajnerit Afrim Tovërlanit shënuan fitore minimale, 1:0, me golin e mesfushorit Argjend Malaj.
Kjo ishte miqësorja e vetme që kishte për ta zhvilluar skuadra e Prishtinës në Zvicër, pasi që ndeshja me skuadrën e Schaffhausenit u anulua për shkaqe teknike.
Category: Futboll
